phir koi KHwab tere rangon se juda nahin dekha

phir koī ḳhvāb tire rañgoñ se judā nahīñ dekhā

kyā kuchh dekh liyā thā ham ne kyā nahīñ dekhā

avval-e-ishq kī saa.at jā kar phir nahīñ aa.ī

phir koī mausam pahle mausam sā nahīñ dekhā

sab ne dekhā thā tirā ham ko ruḳhsat karnā

ham ne jo manzar dekhne vaalā thā nahīñ dekhā

be-kal be-kal rahnā diid kā phal to nahīñ hai

dekhne vaalī aañkh ne jaane kyā nahīñ dekhā

ham jise parda-e-ḳhvāb meñ rah kar dekh rahe haiñ

jāgne vaalo tum ne bhī dekhā yā nahīñ dekhā

phir koi KHwab tere rangon se juda nahin dekha

kya kuchh dekh liya tha hum ne kya nahin dekha

awwal-e-ishq ki saat ja kar phir nahin aai

phir koi mausam pahle mausam sa nahin dekha

sab ne dekha tha tera hum ko ruKHsat karna

hum ne jo manzar dekhne wala tha nahin dekha

be-kal be-kal rahna did ka phal to nahin hai

dekhne wali aankh ne jaane kya nahin dekha

hum jise parda-e-KHwab mein rah kar dekh rahe hain

jagne walo tum ne bhi dekha ya nahin dekha