phulon ko waise bhi murjhana hai murjhaenge

phūloñ ko vaise bhī murjhānā hai murjhā.eñge

khiḌkiyāñ kholīñ to sannāTe chale ā.eñge

laakh ham ujlī rakheñ shahr kī dīvāroñ ko

shahr-nāme to bahar-hāl likkhe jā.eñge

raakh rah jā.egī rūdād sunāne ke liye

ye to mehmān parinde haiñ chale jā.eñge

apnī laġhzish ko to ilzām na degā koī

log thak-hār ke mujrim hameñ Thahrā.eñge

aaj jin jag.hoñ kī tafrīh se mahfūz huuñ maiñ

mere hālāt mujhe kal vahāñ pahuñchā.eñge

rāste shaam ko ghar le ke nahīñ lauTeñge

ham tabarruk kī tarah rāhoñ meñ baT jā.eñge

din kisī tarah se kaT jā.egā saḌkoñ pe 'shafaq'

shaam phir aa.egī ham shaam se ghabrā.eñge

phulon ko waise bhi murjhana hai murjhaenge

khiDkiyan kholin to sannaTe chale aaenge

lakh hum ujli rakhen shahr ki diwaron ko

shahr-name to bahar-haal likkhe jaenge

rakh rah jaegi rudad sunane ke liye

ye to mehman parinde hain chale jaenge

apni laghzish ko to ilzam na dega koi

log thak-haar ke mujrim hamein Thahraenge

aaj jin jaghon ki tafrih se mahfuz hun main

mere haalat mujhe kal wahan pahunchaenge

raste sham ko ghar le ke nahin lauTenge

hum tabarruk ki tarah rahon mein baT jaenge

din kisi tarah se kaT jaega saDkon pe 'shafaq'

sham phir aaegi hum sham se ghabraenge