qahr ki kyun nigah hai pyare

qahr kī kyuuñ nigāh hai pyāre

kyā mohabbat gunāh hai pyāre

dil ko apnī hī jalva-gāh samajh

aa nazar farsh-e-rāh hai pyāre

pher lī tū ne jab se apnī nazar

merī duniyā siyāh hai pyāre

shak bhī kis par mirī mohabbat par

jis kā tū ḳhud gavāh hai pyāre

terī māsūm sī nazar kī qasam

yahī vaj.h-e-gunāh hai pyāre

do nigāheñ jahāñ pe mil jaa.eñ

ishq kī shāh-rāh hai pyāre

muñh jo sī detī thī shikāyat kā

ab kidhar vo nigāh hai pyāre

jo ba-zāhir nahīñ mirī jānib

vo nazar be-panāh hai pyāre

sach batā kuchh ḳhafā hai tū mujh se

yā hayā sadd-e-rāh hai pyāre

ajnabī ban rahī hai terī nazar

ḳhatm kyā rasm o raah hai pyāre

rāh-e-ulfat meñ Thaharnā kaisā

dam bhī lenā gunāh hai pyāre

dil sī shai aur nā-pasand tujhe

apnī apnī nigāh hai pyāre

nek irādoñ ke sañg-rezoñ par

shāh-rāh-e-gunāh hai pyāre

lab pe aatī hai jo hañsī ban kar

ek aisī bhī aah hai pyāre

ishq meñ vo bhī ek vaqt hai jab

be-gunāhī gunāh hai pyāre

aur 'mullā' ko kyā miTāte ho

vo to yūñhī tabāh hai pyāre

qahr ki kyun nigah hai pyare

kya mohabbat gunah hai pyare

dil ko apni hi jalwa-gah samajh

aa nazar farsh-e-rah hai pyare

pher li tu ne jab se apni nazar

meri duniya siyah hai pyare

shak bhi kis par meri mohabbat par

jis ka tu KHud gawah hai pyare

teri masum si nazar ki qasam

yahi wajh-e-gunah hai pyare

do nigahen jahan pe mil jaen

ishq ki shah-rah hai pyare

munh jo si deti thi shikayat ka

ab kidhar wo nigah hai pyare

jo ba-zahir nahin meri jaanib

wo nazar be-panah hai pyare

sach bata kuchh KHafa hai tu mujh se

ya haya sadd-e-rah hai pyare

ajnabi ban rahi hai teri nazar

KHatm kya rasm o rah hai pyare

rah-e-ulfat mein Thaharna kaisa

dam bhi lena gunah hai pyare

dil si shai aur na-pasand tujhe

apni apni nigah hai pyare

nek iradon ke sang-rezon par

shah-rah-e-gunah hai pyare

lab pe aati hai jo hansi ban kar

ek aisi bhi aah hai pyare

ishq mein wo bhi ek waqt hai jab

be-gunahi gunah hai pyare

aur 'mulla' ko kya miTate ho

wo to yunhi tabah hai pyare