qirtas pe naqshe hamein kya kya nazar aae

qirtās pe naqshe hameñ kyā kyā nazar aa.e

sab ḳhushk nazar aa.e jo dariyā nazar aa.e

kis ko shab-e-hijrāñ kī girānī kā ho ehsās

jab din chaḌhe bāzār meñ taarā nazar aa.e

patthar sā vo lagtā hai TaTolo na jo dil ko

aur haath meñ le lo to sarāpā nazar aa.e

sahrā kī sadā jis ko samajhte rahe kal tak

vo harf-e-junūñ ab chaman-ārā nazar aa.e

manzil kā ta.ayyun hī ḳhalā meñ nahīñ mumkin

ham ko to koī dasht na dariyā nazar aa.e

ai kaash mire gosh o nazar bhī raheñ sābit

jab husn sunā jaa.e yā naġhma nazar aa.e

ik halqa-e-ahbāb hai tanhā.ī bhī us kī

ik ham haiñ ki har bazm meñ tanhā nazar aa.e

ham ne jo tarāshe the sanam ahd-e-junūñ meñ

un meñ se har ik aaj shivāla nazar aa.e

is daur kī taḳhlīq bhī kyā shīshagarī hai

har aa.ine meñ aadmī ulTā nazar aa.e

qirtas pe naqshe hamein kya kya nazar aae

sab KHushk nazar aae jo dariya nazar aae

kis ko shab-e-hijran ki girani ka ho ehsas

jab din chaDhe bazar mein tara nazar aae

patthar sa wo lagta hai TaTolo na jo dil ko

aur hath mein le lo to sarapa nazar aae

sahra ki sada jis ko samajhte rahe kal tak

wo harf-e-junun ab chaman-ara nazar aae

manzil ka tayyun hi KHala mein nahin mumkin

hum ko to koi dasht na dariya nazar aae

ai kash mere gosh o nazar bhi rahen sabit

jab husn suna jae ya naghma nazar aae

ek halqa-e-ahbab hai tanhai bhi us ki

ek hum hain ki har bazm mein tanha nazar aae

hum ne jo tarashe the sanam ahd-e-junun mein

un mein se har ek aaj shiwala nazar aae

is daur ki taKHliq bhi kya shishagari hai

har aaine mein aadmi ulTa nazar aae