rah-e-wafa mein koi hamein jaanta na tha

rāh-e-vafā meñ koī hameñ jāntā na thā

jab tak diyā hamāre lahū kā jalā na thā

ye mo.ajiza hamāre hī tarz-e-bayāñ kā thā

us ne vo sun liyā thā jo ham ne kahā na thā

jab āshiyāne jal ga.e tab ham-navā hue

gulshan meñ is se pahle koī boltā na thā

tū ḳhud hī qatra qatra pighaltā thā roz-o-shab

shāmil tire zavāl meñ dast-e-duā na thā

shiddat kī dhuup meñ bhī na pighlā mirā vajūd

mujh par tumhārī zulfoñ kā jab shāmiyāna thā

jugnū thā kahkashāñ thā sitāra thā yā guhar

aañsū kisī kī aañkh se jab tak girā na thā

'aḳhtar' gunāh karne se phir roktā thā kaun

maiñ kaise maan luuñ ki vahāñ par ḳhudā na thā

rah-e-wafa mein koi hamein jaanta na tha

jab tak diya hamare lahu ka jala na tha

ye moajiza hamare hi tarz-e-bayan ka tha

us ne wo sun liya tha jo hum ne kaha na tha

jab aashiyane jal gae tab ham-nawa hue

gulshan mein is se pahle koi bolta na tha

tu KHud hi qatra qatra pighalta tha roz-o-shab

shamil tere zawal mein dast-e-dua na tha

shiddat ki dhup mein bhi na pighla mera wajud

mujh par tumhaari zulfon ka jab shamiyana tha

jugnu tha kahkashan tha sitara tha ya guhar

aansu kisi ki aankh se jab tak gira na tha

'aKHtar' gunah karne se phir rokta tha kaun

main kaise man lun ki wahan par KHuda na tha