raat bhar suraj ke ban kar ham-safar wapas hue

raat bhar sūraj ke ban kar ham-safar vāpas hue

shaam bichhḌe ham to hañgām-e-sahar vāpas hue

jalva-gāh-e-zāt se kab ḳhud-nigar vāpas hue

aur agar vāpas hue to be-basar vāpas hue

thī hameñ malhūz-e-ḳhātir nek-nāmī is qadar

chuum kar nazroñ se un ke bām-o-dar vāpas hue

muzhda parvāz-e-adam kā hai ki rāhat kī naved

dam laboñ par hai to apne bāl-o-par vāpas hue

shauq-e-manzil thā kahāñ mujh sā kisī kā mo'tabar

do qadam bhī chal na paa.e ham-safar vāpas hue

kārvāñ se jo bhī bichhḌā gard-e-sahrā ho gayā

TuuT kar patte kab apnī shāḳh par vāpas hue

sub.h dam le kar chalī ghar se talāsh-e-rozgār

shaam ham ruḳh par liye gard-e-safar vāpas hue

zindagī meñ aa.iiñ sub.heñ aur shāmeñ bhī bahut

ahd-e-rafta ke kahāñ shām-o-sahar vāpas hue

āḳhirash bujh hī gayā hai ḳhush-gumānī kā charāġh

tum bichhaḌ kar phir kahāñ imkān bhar vāpas hue

ḳhush-gumānī kā bharam rakkhā na.ī pahchān ne

phir mire naġhmoñ meñ Dhal kar sīm-bar vāpas hue

hosh se aarī rahī dīvāngī apnī 'zafar'

bā-ḳhabar mahfil meñ rah kar be-ḳhabar vāpas hue

raat bhar suraj ke ban kar ham-safar wapas hue

sham bichhDe hum to hangam-e-sahar wapas hue

jalwa-gah-e-zat se kab KHud-nigar wapas hue

aur agar wapas hue to be-basar wapas hue

thi hamein malhuz-e-KHatir nek-nami is qadar

chum kar nazron se un ke baam-o-dar wapas hue

muzhda parwaz-e-adam ka hai ki rahat ki nawed

dam labon par hai to apne baal-o-par wapas hue

shauq-e-manzil tha kahan mujh sa kisi ka mo'tabar

do qadam bhi chal na pae ham-safar wapas hue

karwan se jo bhi bichhDa gard-e-sahra ho gaya

TuT kar patte kab apni shaKH par wapas hue

subh dam le kar chali ghar se talash-e-rozgar

sham hum ruKH par liye gard-e-safar wapas hue

zindagi mein aain subhen aur shamen bhi bahut

ahd-e-rafta ke kahan sham-o-sahar wapas hue

aaKHirash bujh hi gaya hai KHush-gumani ka charagh

tum bichhaD kar phir kahan imkan bhar wapas hue

KHush-gumani ka bharam rakkha nai pahchan ne

phir mere naghmon mein Dhal kar sim-bar wapas hue

hosh se aari rahi diwangi apni 'zafar'

ba-KHabar mahfil mein rah kar be-KHabar wapas hue