rind betab hain ghanghor ghaTa chhai hai

riñd betāb haiñ ghanghor ghaTā chhā.ī hai

mai-kade guuñj rahe haiñ vo bahār aa.ī hai

bazm-e-aġhyār meñ us ne mujhe daryāft kiyā

ba.ad muddat ke use yaad mirī aa.ī hai

kaT hī jaatī haiñ kisī tarah hamārī rāteñ

ġham salāmat rahe vo monis-e-tanhā.ī hai

qatl karne ko mire aate haiñ vo teġh-ba-dast

maiñ samajhtā huuñ mire haq meñ masīhā.ī hai

un ko ye zid hai na dekheñge kabhī merī taraf

maiñ ne bhī dar se na uThne kī qasam khaa.ī hai

hai ye rindoñ ke ta.āqub meñ koī raaz amiiq

varna auroñ se bhī vaa.iz kī shanāsā.ī hai

pūchhne aa.e haiñ vo haal mirā ai 'hāfiz'

zo.af se salb yahāñ tāqat-e-goyā.ī hai

rind betab hain ghanghor ghaTa chhai hai

mai-kade gunj rahe hain wo bahaar aai hai

bazm-e-aghyar mein us ne mujhe daryaft kiya

baad muddat ke use yaad meri aai hai

kaT hi jati hain kisi tarah hamari raaten

gham salamat rahe wo monis-e-tanhai hai

qatl karne ko mere aate hain wo tegh-ba-dast

main samajhta hun mere haq mein masihai hai

un ko ye zid hai na dekhenge kabhi meri taraf

main ne bhi dar se na uThne ki qasam khai hai

hai ye rindon ke taaqub mein koi raaz amiq

warna auron se bhi waiz ki shanasai hai

puchhne aae hain wo haal mera ai 'hafiz'

zoaf se salb yahan taqat-e-goyai hai