sahil-e-intizar mein tanha

sāhil-e-intizār meñ tanhā

yaad vo lahar lahar aa.e mujhe

dasht-e-dīvāngī ke Tīloñ par

raqs kartī havā bulā.e mujhe

ajnabī mujh se aa gale mil le

aaj ik dost yaad aa.e mujhe

bhuul baiThā huuñ maiñ zamāne ko

ab zamāna bhī bhuul jaa.e mujhe

ik gharauñdā huuñ ret kā paiham

koī Dhaa.e mujhe banā.e mujhe

ek harf-e-ġhalat huuñ hastī kā

nestī kyuuñ na phir miTā.e mujhe

daf.atan mere rū-ba-rū aa kar

aa.ine meñ koī Darā.e mujhe

āñdhiyāñ kyuuñ mirī talāsh meñ hoñ

ek jhoñkā hī jab bujhā.e mujhe

jaise ik naqsh-e-nā-durust ko tifl

koī andar se yuuñ miTā.e mujhe

raakh apnī umañg kī huuñ 'razā'

aa ke jhoñkā koī uḌaa.e mujhe

sahil-e-intizar mein tanha

yaad wo lahar lahar aae mujhe

dasht-e-diwangi ke Tilon par

raqs karti hawa bulae mujhe

ajnabi mujh se aa gale mil le

aaj ek dost yaad aae mujhe

bhul baiTha hun main zamane ko

ab zamana bhi bhul jae mujhe

ek gharaunda hun ret ka paiham

koi Dhae mujhe banae mujhe

ek harf-e-ghalat hun hasti ka

nesti kyun na phir miTae mujhe

dafatan mere ru-ba-ru aa kar

aaine mein koi Darae mujhe

aandhiyan kyun meri talash mein hon

ek jhonka hi jab bujhae mujhe

jaise ek naqsh-e-na-durust ko tifl

koi andar se yun miTae mujhe

rakh apni umang ki hun 'raza'

aa ke jhonka koi uDae mujhe