sare kushton se juda Dhang iztirab-e-dil ka hai

saare kushtoñ se judā Dhang iztirāb-e-dil kā hai

kyuuñ na ho bismil bhī to kis chulbule qātil kā hai

chhup nahīñ saktā vo ḳhuun apne dil-e-bismil kā hai

miT nahīñ saktā jo dhabba dāman-e-qātil kā hai

imtihāñ madd-e-nazar kis manchale bismil kā hai

mā'rka aarā jo yuuñ har naaz us qātil kā hai

be-ijāzat uTh ke siina se lagā.e aap ko

hausla itnā bhī ik armān vaale dil kā hai

aap ko yaad aa ga.iiñ haiñ kis kī bazm-ārā.iyāñ

hazrat-e-dil kahiye to qasd aaj kis mahfil kā hai

us taraf machlā huā hai vasl meñ vo chulbulā

is taraf josh iztirāb-e-ārzū-e-dil kā hai

vasl kī shab ḳhuun karnā ārzū-e-vasl kā

o tamannāoñ ke dushman kaam ye qātil kā hai

mārka-ārā.īyāñ haiñ aaj husn-o-ishq kī

sāmnā is jalva-gah meñ dilrubā se dil kā hai

apne aadhī raat ko aane kā baa.is kyuuñ bane

vo kahīñ qaa.il bhī jazb-e-ulfat-e-kāmil kā hai

maut aa.ī hai mujhe o bahr-e-ḳhūbī vasl meñ

merā beḌā Dūbne vaalā lab-e-sāhil kā hai

siina se siina milā denā to kuchh mushkil nahīñ

yaar mushkil to tire dil se milānā dil kā hai

shoḳhī-e-qātil meñ hai bismil kā rañg-e-iztirāb

rañg bismil kī taḌap meñ shoḳhī-e-qātil kā hai

sare kushton se juda Dhang iztirab-e-dil ka hai

kyun na ho bismil bhi to kis chulbule qatil ka hai

chhup nahin sakta wo KHun apne dil-e-bismil ka hai

miT nahin sakta jo dhabba daman-e-qatil ka hai

imtihan madd-e-nazar kis manchale bismil ka hai

ma'rka aara jo yun har naz us qatil ka hai

be-ijazat uTh ke sina se lagae aap ko

hausla itna bhi ek arman wale dil ka hai

aap ko yaad aa gain hain kis ki bazm-araiyan

hazrat-e-dil kahiye to qasd aaj kis mahfil ka hai

us taraf machla hua hai wasl mein wo chulbula

is taraf josh iztirab-e-arzu-e-dil ka hai

wasl ki shab KHun karna aarzu-e-wasl ka

o tamannaon ke dushman kaam ye qatil ka hai

marka-araiyan hain aaj husn-o-ishq ki

samna is jalwa-gah mein dilruba se dil ka hai

apne aadhi raat ko aane ka bais kyun bane

wo kahin qail bhi jazb-e-ulfat-e-kaamil ka hai

maut aai hai mujhe o bahr-e-KHubi wasl mein

mera beDa Dubne wala lab-e-sahil ka hai

sina se sina mila dena to kuchh mushkil nahin

yar mushkil to tere dil se milana dil ka hai

shoKHi-e-qatil mein hai bismil ka rang-e-iztirab

rang bismil ki taDap mein shoKHi-e-qatil ka hai