sari jafaen sare karam yaad aa gae

saarī jafā.eñ saare karam yaad aa ga.e

jaise bhī yaad aa.e hoñ ham yaad aa ga.e

jab bhī kahīñ se pyaar milā yā ḳhushī milī

duniyā ke dard-o-ranj-o-alam yaad aa ga.e

dekhīñ haiñ jab bhī gul ke qarīñ chand titliyāñ

kitne ḳhayāl-o-ḳhvāb baham yaad aa ga.e

likkhā thā tum ne ḳhat meñ ki tum ne bhulā diyā

kyā hādsa huā hai ki ham yaad aa ga.e

pardes meñ jo aa.ī nazar nargisī nigāh

ik bā-vafā ke dīda-e-nam yaad aa ga.e

muddat huī hai bichhḌe hue apne-āp se

dekhā jo aaj tum ko to ham yaad aa ga.e

suljhā.īñ jab bhī ziist kī 'sāġhar' ne gutthiyāñ

nāgāh terī zulf ke ḳham yaad aa ga.e

sari jafaen sare karam yaad aa gae

jaise bhi yaad aae hon hum yaad aa gae

jab bhi kahin se pyar mila ya KHushi mili

duniya ke dard-o-ranj-o-alam yaad aa gae

dekhin hain jab bhi gul ke qarin chand titliyan

kitne KHayal-o-KHwab baham yaad aa gae

likkha tha tum ne KHat mein ki tum ne bhula diya

kya hadsa hua hai ki hum yaad aa gae

pardes mein jo aai nazar nargisi nigah

ek ba-wafa ke dida-e-nam yaad aa gae

muddat hui hai bichhDe hue apne-ap se

dekha jo aaj tum ko to hum yaad aa gae

suljhain jab bhi zist ki 'saghar' ne gutthiyan

nagah teri zulf ke KHam yaad aa gae