sat rangon se bani hai yaad taza

saat rañgoñ se banī hai yaad taaza

dhuup likh laa.ī mubārakbād taaza

ban ga.ī jannat to hijrat kar ga.e haiñ

nau-ba-nau hai dasht-e-jāñ ābād taaza

lafz o ma.anī kā ziyāñ hai ḳhud-azābī

lauh-e-dil par hai qalam kī daad taaza

āb-e-tāza ḳhanjar-e-ḳhāmosh ko de

hai burīda lab pe phir fariyād taaza

phir bahāne jā.egā laavā lahū kā

ḳhisht-e-dil par ghar kī rakh buniyād taaza

be-charāġhāñ bastiyoñ ko zindagī de

ik sitam aisā bhī kar ījād taaza

aisī chup se aur dil ghuTne lagā hai

kuchh to ho rūh-e-navā irshād taaza

sat rangon se bani hai yaad taza

dhup likh lai mubarakbaad taza

ban gai jannat to hijrat kar gae hain

nau-ba-nau hai dasht-e-jaan aabaad taza

lafz o mani ka ziyan hai KHud-azabi

lauh-e-dil par hai qalam ki dad taza

aab-e-taza KHanjar-e-KHamosh ko de

hai burida lab pe phir fariyaad taza

phir bahane jaega lawa lahu ka

KHisht-e-dil par ghar ki rakh buniyaad taza

be-charaghan bastiyon ko zindagi de

ek sitam aisa bhi kar ijad taza

aisi chup se aur dil ghuTne laga hai

kuchh to ho ruh-e-nawa irshad taza