saba ka narm sa jhonka bhi taziyana hua

sabā kā narm sā jhoñkā bhī tāziyāna huā

ye vaar mujh pe huā bhī to ġhā.ebāna huā

usī ne mujh pe uThā.e haiñ sañg jis ke liye

maiñ paash paash huā ghar nigār-ḳhāna huā

jhulas rahā thā badan garmi-e-nafas se magar

tire ḳhayāl kā ḳhurshīd shāmiyāna huā

ḳhud apne hijr kī ḳhvāhish mujhe aziiz rahī

ye tere vasl kā qissa to ik bahāna huā

ḳhudā kī sard-mizājī samā ga.ī mujh meñ

mirī talāsh kā saudā payambarāna huā

maiñ ik shajar kī tarah rah-guzar meñ Thahrā huuñ

thakan utaar ke tū kis taraf ravāna huā

vo shaḳhs jis ke liye sher kah rahā huuñ 'nasīr'

ġhazal sunā.e hue us ko ik zamāna huā

saba ka narm sa jhonka bhi taziyana hua

ye war mujh pe hua bhi to ghaebana hua

usi ne mujh pe uThae hain sang jis ke liye

main pash pash hua ghar nigar-KHana hua

jhulas raha tha badan garmi-e-nafas se magar

tere KHayal ka KHurshid shamiyana hua

KHud apne hijr ki KHwahish mujhe aziz rahi

ye tere wasl ka qissa to ek bahana hua

KHuda ki sard-mizaji sama gai mujh mein

meri talash ka sauda payambarana hua

main ek shajar ki tarah rah-guzar mein Thahra hun

thakan utar ke tu kis taraf rawana hua

wo shaKHs jis ke liye sher kah raha hun 'nasir'

ghazal sunae hue us ko ek zamana hua