sabhon se yun to hai dil aap ka KHush

sabhoñ se yuuñ to hai dil aap kā ḳhush

agar pūchho to hai ham se hī nā-ḳhush

ḳhushī terī hī hai manzūr ham ko

balā se gar koī nā-ḳhush ho yā ḳhush

ravāq-e-chashm o qasr-e-dil kiyā sair

na kī par aap ne yaañ koī jā ḳhush

jafā kar yā vafā muḳhtār hai tū

mujhe yaksāñ hai kyā nā-ḳhush hai kyā ḳhush

nahīñ us meñ to ġhair-az-jaur lekin

mujhe kyā jaane kyā aa.ī adā ḳhush

kiyā hai garche nā-ḳhush tū ne ham ko

rakhe par ai butāñ tum ko ḳhudā ḳhush

ḳhushī hai sab ko roz-e-īd kī yaañ

hue haiñ mil ke bāham āshnā ḳhush

bhalā kuchh bhī munāsib hai mirī jaañ

ki ho tū aaj ke din mujh se nā-ḳhush

batā aisī koī tadbīr 'bedār'

ki jis se hove merā dilrubā ḳhush

sabhon se yun to hai dil aap ka KHush

agar puchho to hai hum se hi na-KHush

KHushi teri hi hai manzur hum ko

bala se gar koi na-KHush ho ya KHush

rawaq-e-chashm o qasr-e-dil kiya sair

na ki par aap ne yan koi ja KHush

jafa kar ya wafa muKHtar hai tu

mujhe yaksan hai kya na-KHush hai kya KHush

nahin us mein to ghair-az-jaur lekin

mujhe kya jaane kya aai ada KHush

kiya hai garche na-KHush tu ne hum ko

rakhe par ai butan tum ko KHuda KHush

KHushi hai sab ko roz-e-id ki yan

hue hain mil ke baham aashna KHush

bhala kuchh bhi munasib hai meri jaan

ki ho tu aaj ke din mujh se na-KHush

bata aisi koi tadbir 'bedar'

ki jis se howe mera dilruba KHush