sach to ye hai ki tamannaon ki jaan hoti hai

sach to ye hai ki tamannāoñ kī jaañ hotī hai

vahī ik baat jo hairat meñ nihāñ hotī hai

haal kah dete haiñ nāzuk se ishāre aksar

kitnī ḳhāmosh nigāhoñ kī zabāñ hotī hai

mere ehsās o tafakkur meñ sulagtī hai jo aag

vahī mazlūm ke ashkoñ meñ nihāñ hotī hai

haa.e vo vaqt ki jab un kī hasīñ āñkhoñ se

ek pur-kaif tajallī sī ayaañ hotī hai

log kahte haiñ jise husn-e-adā kī shoḳhī

yahī rañgīn ishāroñ kā bayāñ hotī hai

kitnī pyārī hai vo ma.asūm tamannā ai dost

jo tazabzub kī fazāoñ meñ javāñ hotī hai

sach to ye hai ki tamannaon ki jaan hoti hai

wahi ek baat jo hairat mein nihan hoti hai

haal kah dete hain nazuk se ishaare aksar

kitni KHamosh nigahon ki zaban hoti hai

mere ehsas o tafakkur mein sulagti hai jo aag

wahi mazlum ke ashkon mein nihan hoti hai

hae wo waqt ki jab un ki hasin aankhon se

ek pur-kaif tajalli si ayan hoti hai

log kahte hain jise husn-e-ada ki shoKHi

yahi rangin ishaaron ka bayan hoti hai

kitni pyari hai wo masum tamanna ai dost

jo tazabzub ki fazaon mein jawan hoti hai