sadaon ke jangal mein wo KHamushi hai

sadāoñ ke jañgal meñ vo ḳhāmushī hai

ki maiñ ne har āvāz terī sunī hai

udāsī ke āñgan meñ terī talab kī

ajab ḳhushnumā ik kalī khil rahī hai

nayā rañg thā us kā kal vaqt-e-ruḳhsat

ki jaise kisī baat par barhamī hai

use de ke sab kuchh maiñ ye sochtā huuñ

use aur kyā duuñ abhī kuchh kamī hai

vahī lamha lamha lahaknā abhī tak

abhī tak usī yaad kī sholagī hai

sabīleñ mire naam kī aur bhī haiñ

magar pyaas mujh ko tirī buuñd kī hai

tirā naam luuñ sāmne sab ke 'hālī'

ye chāhat mire dil ko ab kāTtī hai

sadaon ke jangal mein wo KHamushi hai

ki main ne har aawaz teri suni hai

udasi ke aangan mein teri talab ki

ajab KHushnuma ek kali khil rahi hai

naya rang tha us ka kal waqt-e-ruKHsat

ki jaise kisi baat par barhami hai

use de ke sab kuchh main ye sochta hun

use aur kya dun abhi kuchh kami hai

wahi lamha lamha lahakna abhi tak

abhi tak usi yaad ki sholagi hai

sabilen mere nam ki aur bhi hain

magar pyas mujh ko teri bund ki hai

tera nam lun samne sab ke 'haali'

ye chahat mere dil ko ab kaTti hai