صحرا کا سفر طے کبھی پیدل نہیں ہوتا

صحرا کا سفر طے کبھی پیدل نہیں ہوتا

وہ دشت مگر آنکھ سے اوجھل نہیں ہوتا

ترتیب سے رکھی ہے ہر اک یاد تمہاری

یہ شانہ کسی بوجھ سے اب شل نہیں ہوتا

اک فلسفہ ایسا کہ سمجھنا نہیں ممکن

ایک ایسا معمہ جو کبھی حل نہیں ہوتا

اک کرب کا موسم ہے جو دائم ہے ابھی تک

اک ہجر کا قصہ کہ مکمل نہیں ہوتا

وہ ہجر بھی کیا ہجر جو لمحوں کے لئے ہو

وہ درد بھی کیسا جو مسلسل نہیں ہوتا

یہ کار محبت ہے یہاں داد نہ شہرت

اس کھیل میں محنت کا کوئی پھل نہیں ہوتا