samajh sakte nahin jo tere mathe ki shikan saqi

samajh sakte nahīñ jo tere māthe kī shikan saaqī

vo kyā jāneñ ki hai bāda-kashī bhī ek fan saaqī

nikāl un ko subū-o-jām meñ jo farq karte haiñ

tamīz-e-besh-o-kam hai aql kā dīvāna-pan saaqī

takalluf bartaraf ham shauq kī mastī se Darte haiñ

yahī hai rāhbar saaqī yahī hai rāhzan saaqī

nazar aatī hai saarī kā.enāt-e-mai-kada raushan

ye kis ke sāġhar-e-rañgīñ se phūTī hai kiran saaqī

haqīqat ek hai sab kī vo ma.abad ho ki mai-ḳhāna

banātī aa rahī haiñ manzileñ merī thakan saaqī

uThā le jām-o-mīnā ḳhatm kar ye daur-e-mai-noshī

ki yaad aate haiñ mujh ko tishna-kāmān-e-vatan saaqī

pas-e-ḳhum baiTh kar 'ehsān' ko kuchh soch lene de

chhiḌā hai mai-kade meñ qissa-e-dār-o-rasan saaqī

samajh sakte nahin jo tere mathe ki shikan saqi

wo kya jaanen ki hai baada-kashi bhi ek fan saqi

nikal un ko subu-o-jam mein jo farq karte hain

tamiz-e-besh-o-kam hai aql ka diwana-pan saqi

takalluf bartaraf hum shauq ki masti se Darte hain

yahi hai rahbar saqi yahi hai rahzan saqi

nazar aati hai sari kaenat-e-mai-kada raushan

ye kis ke saghar-e-rangin se phuTi hai kiran saqi

haqiqat ek hai sab ki wo mabad ho ki mai-KHana

banati aa rahi hain manzilen meri thakan saqi

uTha le jam-o-mina KHatm kar ye daur-e-mai-noshi

ki yaad aate hain mujh ko tishna-kaaman-e-watan saqi

pas-e-KHum baiTh kar 'ehsan' ko kuchh soch lene de

chhiDa hai mai-kade mein qissa-e-dar-o-rasan saqi