sang-e-dar dekh ke sar yaad aaya

sañg-e-dar dekh ke sar yaad aayā

koī dīvāna magar yaad aayā

phir vo andāz-e-nazar yaad aayā

chāk-e-dil tā-ba jigar yaad aayā

zauq-e-arbāb-e-nazar yaad aayā

sajda be-minnat-e-sar yaad aayā

har tabassum pe ye khātā huuñ fareb

ki unheñ dīda-e-tar yaad aayā

phir tirā naqsh-e-qadam hai darkār

sajda-e-rāhguzar yaad aayā

jamā kartā huuñ ġhubār-e-rah-e-dost

sar-e-shorīda magar yaad aayā

haa.e vo mārka-e-nāvak-e-nāz

dil bachāyā to jigar yaad aayā

ā.īna ab nahīñ dekhā jaatā

maiñ ba-unvān-e-digar yaad aayā

dard ko phir hai mire dil kī talāsh

ḳhāna-barbād ko ghar yaad aayā

us ko bhūle to hue ho 'fānī'

kyā karoge vo agar yaad aayā

sang-e-dar dekh ke sar yaad aaya

koi diwana magar yaad aaya

phir wo andaz-e-nazar yaad aaya

chaak-e-dil ta-ba jigar yaad aaya

zauq-e-arbab-e-nazar yaad aaya

sajda be-minnat-e-sar yaad aaya

har tabassum pe ye khata hun fareb

ki unhen dida-e-tar yaad aaya

phir tera naqsh-e-qadam hai darkar

sajda-e-rahguzar yaad aaya

jama karta hun ghubar-e-rah-e-dost

sar-e-shorida magar yaad aaya

hae wo marka-e-nawak-e-naz

dil bachaya to jigar yaad aaya

aaina ab nahin dekha jata

main ba-unwan-e-digar yaad aaya

dard ko phir hai mere dil ki talash

KHana-barbaad ko ghar yaad aaya

us ko bhule to hue ho 'fani'

kya karoge wo agar yaad aaya