sawal dil ka sham-e-gham ko aur udas kar gaya

savāl dil kā shām-e-ġham ko aur udaas kar gayā

tire vajūd meñ jo ek maiñ thā vo kidhar gayā

tilism-e-shauq fikr-e-zinda aur karb-e-āgahī

tamām 'umr kā safar nigāh se guzar gayā

chale to hausla javāñ thā mauj-e-gul thī aarzū

jidhar bhī aañkh uTh ga.ī samāñ nikhar nikhar gayā

kabhī añdherī shab meñ ik muhīb dasht sāmne

kabhī mah-e-tamām saath saath tā-sahar gayā

har ek daur munfarid thā ab bhī dil pe naqsh hai

gayā to yuuñ lagā ki jī kā ek hissa mar gayā

na yaad kī chubhan koī na koī lau malāl kī

maiñ jaane kitnī duur yūñhī ḳhud se be-ḳhabar gayā

nigāh-e-dost dil-navāz bhī girah-kushā bhī thī

khulā jo dil pe zindagī kā bhed jī Thahar gayā

jahāñ vajūd meñ thā ''maiñ'' ab ek aur naam hai

ki merā bigḌā kaam us ke lutf se sañvar gayā

vo sail-e-nūr shab kī ibtidā se tā-sahar gayā

dil us ke bal pe apne bahr-e-ġham ke paar utar gayā

sawal dil ka sham-e-gham ko aur udas kar gaya

tere wajud mein jo ek main tha wo kidhar gaya

tilism-e-shauq fikr-e-zinda aur karb-e-agahi

tamam 'umr ka safar nigah se guzar gaya

chale to hausla jawan tha mauj-e-gul thi aarzu

jidhar bhi aankh uTh gai saman nikhar nikhar gaya

kabhi andheri shab mein ek muhib dasht samne

kabhi mah-e-tamam sath sath ta-sahar gaya

har ek daur munfarid tha ab bhi dil pe naqsh hai

gaya to yun laga ki ji ka ek hissa mar gaya

na yaad ki chubhan koi na koi lau malal ki

main jaane kitni dur yunhi KHud se be-KHabar gaya

nigah-e-dost dil-nawaz bhi girah-kusha bhi thi

khula jo dil pe zindagi ka bhed ji Thahar gaya

jahan wajud mein tha main ab ek aur nam hai

ki mera bigDa kaam us ke lutf se sanwar gaya

wo sail-e-nur shab ki ibtida se ta-sahar gaya

dil us ke bal pe apne bahr-e-gham ke par utar gaya