shah-e-alam ko sar-e-am suna baiTha hun

shāh-e-ālam ko sar-e-ām sunā baiThā huuñ

mere maulā tirī chaukhaT se lagā baiThā huuñ

mujhe ma.alūm haiñ ādāb-e-nashist-o-barḳhāst

tire darbār meñ ik umr uThā baiThā huuñ

isī mausam kī tamannā thī ka.ī barsoñ se

bādbāñ kholne the aur girā baiThā huuñ

bhuul jaanā thā jise sabt hai dil par mere

yaad rakhnā thā jise us ko bhulā baiThā huuñ

baat kaise maiñ karūñ aañkh milā kar us se

sāmne jis ke nigāhoñ ko jhukā baiThā huuñ

vāpsī kā koī rasta nahīñ miltā 'yāsir'

kashtiyāñ apnī maiñ pahle hī jalā baiThā huuñ

shah-e-alam ko sar-e-am suna baiTha hun

mere maula teri chaukhaT se laga baiTha hun

mujhe malum hain aadab-e-nashist-o-barKHast

tere darbar mein ek umr uTha baiTha hun

isi mausam ki tamanna thi kai barson se

baadban kholne the aur gira baiTha hun

bhul jaana tha jise sabt hai dil par mere

yaad rakhna tha jise us ko bhula baiTha hun

baat kaise main karun aankh mila kar us se

samne jis ke nigahon ko jhuka baiTha hun

wapsi ka koi rasta nahin milta 'yasir'

kashtiyan apni main pahle hi jala baiTha hun