shua-e-zar na mili rang-e-shairana mila

shuā-e-zar na milī rañg-e-shā.irāna milā

matā-e-nūr se kyā mujh ko munsifāna milā

maiñ kis se pūchhūñ ki is sail-e-ḳhāk se bāhar

kise nikalnā na thā kis ko rāsta na milā

kahīñ dikhā.ī na dī anjum-e-duā kī chamak

ghane añdhere meñ ik haath bhī uThā na milā

bhaTak rahā huuñ maiñ is dasht-e-sañg meñ kab se

abhī talak to dar-e-ā.īna khulā na milā

jalā.e phirtā rahā mish.al-e-tajassus maiñ

magar surāġh kahīñ khoī shaam kā na milā

ugaltā hogā kabhī sonā chāñdī ḳhitta-e-dil

mujhe to ek bhī sikka yahāñ paḌā na milā

navāh-e-jāñ meñ vo tūfān-e-habs thā ki 'hasan'

havā to kyā ki kahīñ havā na milā

shua-e-zar na mili rang-e-shairana mila

mata-e-nur se kya mujh ko munsifana mila

main kis se puchhun ki is sail-e-KHak se bahar

kise nikalna na tha kis ko rasta na mila

kahin dikhai na di anjum-e-dua ki chamak

ghane andhere mein ek hath bhi uTha na mila

bhaTak raha hun main is dasht-e-sang mein kab se

abhi talak to dar-e-aina khula na mila

jalae phirta raha mishal-e-tajassus main

magar suragh kahin khoi sham ka na mila

ugalta hoga kabhi sona chandi KHitta-e-dil

mujhe to ek bhi sikka yahan paDa na mila

nawah-e-jaan mein wo tufan-e-habs tha ki 'hasan'

hawa to kya ki kahin hawa na mila