shuur-e-nau-umr hun na mujhko mata-e-ranj-o-malal dena

shu.ūr-e-nau-umr huuñ na mujh ko matā-e-rañj-o-malāl denā

ki mujh ko aatā nahīñ ġhamoñ ko ḳhushī ke sāñchoñ maiñ Dhaal denā

hudūd meñ apnī rah ke shāyad bachā sakūñ maiñ vajūd apnā

maiñ ek qatra huuñ mujh ko dariyā ke rāste par na Daal denā

agar ḳhalā meñ pahuñch gayā to palaT ke vāpas na aa sakūñgā

tum apnī hadd-e-kashish se ūñchā na mujh ko yaaro uchhāl denā

vo sūratan aadmī hai lekin mizāj se mār-e-āstīñ hai

agar use āstīñ meñ rakhnā to zahr pahle nikāl denā

na jaane khiḌkī se jhāñktī ye kiran kise rāsta dikhā de

tum apne kamre kī khiḌkiyoñ par dabīz parde na Daal denā

sukūt-e-shab toḌne kī ḳhātir bhī koī hañgāma saath rakhnā

na shaam hote hī har tamannā ko qaid-ḳhāne maiñ Daal denā

ye ham ne maanā ki tum meñ sūraj kī sī tapish hai magar ye sun lo

ki ham samundar haiñ aur āsāñ nahīñ samundar ubaal denā

shuur-e-nau-umr hun na mujh ko mata-e-ranj-o-malal dena

ki mujh ko aata nahin ghamon ko KHushi ke sanchon main Dhaal dena

hudud mein apni rah ke shayad bacha sakun main wajud apna

main ek qatra hun mujh ko dariya ke raste par na Dal dena

agar KHala mein pahunch gaya to palaT ke wapas na aa sakunga

tum apni hadd-e-kashish se uncha na mujh ko yaro uchhaal dena

wo suratan aadmi hai lekin mizaj se mar-e-astin hai

agar use aastin mein rakhna to zahr pahle nikal dena

na jaane khiDki se jhankti ye kiran kise rasta dikha de

tum apne kamre ki khiDkiyon par dabiz parde na Dal dena

sukut-e-shab toDne ki KHatir bhi koi hangama sath rakhna

na sham hote hi har tamanna ko qaid-KHane main Dal dena

ye hum ne mana ki tum mein suraj ki si tapish hai magar ye sun lo

ki hum samundar hain aur aasan nahin samundar ubaal dena