sitara aankh mein dil mein gulab kya rakhna

sitāra aañkh meñ dil meñ gulāb kyā rakhnā

ki Dhaltī umr meñ rañg-e-shabāb kyā rakhnā

jo regzār-e-badan meñ ġhubār uḌtā ho

to chashm-e-ḳhāk-e-rasīda meñ ḳhvāb kyā rakhnā

safar nasīb hī Thahrā jo dasht-e-ġhurbat kā

to phir gumāñ meñ fareb-e-sahāb kyā rakhnā

jo Duub jaanā hai ik din jazīra-e-dil bhī

to koī naqsh sar-e-sat.h-e-āb kyā rakhnā

ulaT hī denā hai āḳhir piyāla-e-jāñ bhī

havā ke dosh pe tasht-e-habāb kyā rakhnā

bas itnā yaad hai ik bhuul sī huī thī kahīñ

ab is se baḌh ke dukhoñ kā hisāb kyā rakhnā

sitara aankh mein dil mein gulab kya rakhna

ki Dhalti umr mein rang-e-shabab kya rakhna

jo regzar-e-badan mein ghubar uDta ho

to chashm-e-KHak-e-rasida mein KHwab kya rakhna

safar nasib hi Thahra jo dasht-e-ghurbat ka

to phir guman mein fareb-e-sahab kya rakhna

jo Dub jaana hai ek din jazira-e-dil bhi

to koi naqsh sar-e-sath-e-ab kya rakhna

ulaT hi dena hai aaKHir piyala-e-jaan bhi

hawa ke dosh pe tasht-e-habab kya rakhna

bas itna yaad hai ek bhul si hui thi kahin

ab is se baDh ke dukhon ka hisab kya rakhna