sitara sham se nikla hua hai

sitāra shaam se niklā huā hai

diyā bhī taaq meñ rakkhā huā hai

kahīñ vo raat bhī mahkī huī hai

kahīñ vo chāñd bhī chamkā huā hai

abhī vo aañkh bhī soī nahīñ hai

abhī vo ḳhvāb bhī jaagā huā hai

kisī bādal ko chhū kar aa rahī hai

havā kā pairahan bhīgā huā hai

zamīñ be-aks ho kar rah ga.ī hai

falak kā aa.ina mailā huā hai

ḳhamoshī jhāñktī hai khiḌkiyoñ se

galī meñ shor sā phailā huā hai

havā gum-sum khaḌī hai rāste meñ

musāfir soch meñ Duubā huā hai

koī nīñdoñ meñ ḳhushbū gholtā hai

darīcha ḳhvāb kā mahkā huā hai

kisī guzre baras kī Diary meñ

tumhārā naam bhī likkhā huā hai

charāġh-e-shām kī āñkheñ bujhī haiñ

sitāra ḳhvāb kā TuuTā huā hai

safar kī raat hai 'nāsir' diloñ meñ

'ajab ik dard sā Thahrā huā hai

sitara sham se nikla hua hai

diya bhi taq mein rakkha hua hai

kahin wo raat bhi mahki hui hai

kahin wo chand bhi chamka hua hai

abhi wo aankh bhi soi nahin hai

abhi wo KHwab bhi jaga hua hai

kisi baadal ko chhu kar aa rahi hai

hawa ka pairahan bhiga hua hai

zamin be-aks ho kar rah gai hai

falak ka aaina maila hua hai

KHamoshi jhankti hai khiDkiyon se

gali mein shor sa phaila hua hai

hawa gum-sum khaDi hai raste mein

musafir soch mein Duba hua hai

koi nindon mein KHushbu gholta hai

daricha KHwab ka mahka hua hai

kisi guzre baras ki Diary mein

tumhaara nam bhi likkha hua hai

charagh-e-sham ki aankhen bujhi hain

sitara KHwab ka TuTa hua hai

safar ki raat hai 'nasir' dilon mein

'ajab ek dard sa Thahra hua hai