sone ke dil miTTi ke ghar pichhe chhoD aae hain

sone ke dil miTTī ke ghar pīchhe chhoḌ aa.e haiñ

vo galiyāñ vo shahr ke manzar pīchhe chhoḌ aa.e haiñ

apne ā.īnoñ ko ham ne rog lagā rakkhā hai

kyā kyā chehre ham shīshagar pīchhe chhoḌ aa.e haiñ

tum apne dariyā kā ronā rone aa jaate ho

ham to apne saat samundar pīchhe chhoḌ aa.e haiñ

dekho ham ne apnī jānoñ par kyā zulm kiyā hai

phuul sā chehra chāñd sā paikar pīchhe chhoḌ aa.e haiñ

ham bhī kyā pāgal the apne pyaar kī saarī pūñjī

us kī ik ik yaad bachā kar pīchhe chhoḌ aa.e haiñ

manzil se ab duur nikal aa.e haiñ 'qais' to ḳhush haiñ

ham-sā.e ke kutte kā Dar pīchhe chhoḌ aa.e haiñ

sone ke dil miTTi ke ghar pichhe chhoD aae hain

wo galiyan wo shahr ke manzar pichhe chhoD aae hain

apne aainon ko hum ne rog laga rakkha hai

kya kya chehre hum shishagar pichhe chhoD aae hain

tum apne dariya ka rona rone aa jate ho

hum to apne sat samundar pichhe chhoD aae hain

dekho hum ne apni jaanon par kya zulm kiya hai

phul sa chehra chand sa paikar pichhe chhoD aae hain

hum bhi kya pagal the apne pyar ki sari punji

us ki ek ek yaad bacha kar pichhe chhoD aae hain

manzil se ab dur nikal aae hain 'qais' to KHush hain

ham-sae ke kutte ka Dar pichhe chhoD aae hain