sozish-e-gham ba-ru-e-kar aai

sozish-e-ġham ba-rū-e-kār aa.ī

aah bhī lab pe sho.ala-bār aa.ī

chashm-e-giryāñ kī ābyārī se

dil ke dāġhoñ pe phir bahār aa.ī

dast-e-vahshat kī kār-farmā.ī

tā-ba-dāmān-e-tār-tār aa.ī

tere dīvāne kyā bhalā jāneñ

kab ḳhizāñ aa.ī kab bahār aa.ī

kasmapursī kā uf-re ye aalam

yaad ham ko jafā-e-yār aa.ī

dekho vo chhā.ī uudī uudī ghaTā

mai-gusāroñ kī ġham-gusār aa.ī

sū-e-gulshan jo aaj aa nikle

yaar kī yaad baar baar aa.ī

bhīnī bhīnī kisī badan kī mahak

bū-e-gesū-e-mushk-bār aa.ī

ġhuncha o gul kā dekh kar jauban

yād-e-mahbūb-e-gul-azār aa.ī

hai javānī ḳhud apnī mashshāta

husn ko kis qadar nikhār aa.ī

'ḳhār' ulfat kī baat jaane do

zindagī kis ko sāzgār aa.ī

sozish-e-gham ba-ru-e-kar aai

aah bhi lab pe shoala-bar aai

chashm-e-giryan ki aabyari se

dil ke daghon pe phir bahaar aai

dast-e-wahshat ki kar-farmai

ta-ba-daman-e-tar-tar aai

tere diwane kya bhala jaanen

kab KHizan aai kab bahaar aai

kasmapursi ka uf-re ye aalam

yaad hum ko jafa-e-yar aai

dekho wo chhai udi udi ghaTa

mai-gusaron ki gham-gusar aai

su-e-gulshan jo aaj aa nikle

yar ki yaad bar bar aai

bhini bhini kisi badan ki mahak

bu-e-gesu-e-mushk-bar aai

ghuncha o gul ka dekh kar jauban

yaad-e-mahbub-e-gul-azar aai

hai jawani KHud apni mashshata

husn ko kis qadar nikhaar aai

'KHar' ulfat ki baat jaane do

zindagi kis ko sazgar aai