subh-e-nau hum to tere sath numayan honge

sub.h-e-nau ham to tire saath numāyāñ hoñge

aur hoñge jo halāk-e-shab-e-hijrāñ hoñge

sadma-e-zīst ke shikve na kar ai jān-e-'ra.īs'

ba-ḳhudā ye na tire dard kā darmāñ hoñge

merī vahshat meñ abhī aur taraqqī hogī

tere gesū to abhī aur pareshāñ hoñge

āzmā.egā bahar-hāl hameñ jabr-e-hayāt

ham abhī aur asīr-e-ġham-e-daurāñ hoñge

āshiqī aur marāhil se abhī guzregī

imtihāñ aur mohabbat ke mirī jaañ hoñge

qalb-e-pākīza-nihād o dil-e-sāfī de kar

ā.īna ham ko banāyā hai to hairāñ hoñge

sadqa-e-tīrgī-e-shab se gila-sañj na ho

ki na.e chāñd isī shab se firozāñ hoñge

aaj hai jabr-o-tashaddud kī hukūmat ham par

kal hamīñ beḳh-kun-e-qaisar-o-ḳhāqāñ hoñge

vo ki auhām o ḳhurāfāt ke haiñ said-e-zabūñ

āḳhir is dām-e-ġhulāmī se gurezāñ hoñge

sirf tārīḳh kī raftār badal jā.egī

na.ī tārīḳh ke vāris yahī insāñ hoñge

subh-e-nau hum to tere sath numayan honge

aur honge jo halak-e-shab-e-hijran honge

sadma-e-zist ke shikwe na kar ai jaan-e-'rais'

ba-KHuda ye na tere dard ka darman honge

meri wahshat mein abhi aur taraqqi hogi

tere gesu to abhi aur pareshan honge

aazmaega bahar-haal hamein jabr-e-hayat

hum abhi aur asir-e-gham-e-dauran honge

aashiqi aur marahil se abhi guzregi

imtihan aur mohabbat ke meri jaan honge

qalb-e-pakiza-nihad o dil-e-safi de kar

aaina hum ko banaya hai to hairan honge

sadqa-e-tirgi-e-shab se gila-sanj na ho

ki nae chand isi shab se firozan honge

aaj hai jabr-o-tashaddud ki hukumat hum par

kal hamin beKH-kun-e-qaisar-o-KHaqan honge

wo ki auham o KHurafat ke hain said-e-zabun

aaKHir is dam-e-ghulami se gurezan honge

sirf tariKH ki raftar badal jaegi

nai tariKH ke waris yahi insan honge