subh ko chain na ho sham ko aaram na ho

sub.h ko chain na ho shaam ko ārām na ho

is se behtar hai mirī sub.h na ho shaam na ho

mahfil-e-daur-e-ġhazal sarf-e-mai-o-jām na ho

zindagī merī bhalā kaise bad-anjām na ho

har ghaḌī sāmne hai silsila-e-dār-o-rasan

tujh sā zālim koī ai gardish-e-ayyām na ho

nā-murādī kī shikāyat zarā ye to socheñ

nā-murādī hī kahīñ ishq kā in.aam na ho

mujh ko duniyā se hai ummīd vafā kī ab tak

koī bhī is tarah sar-gashta-e-auhām na ho

shauq hai tujh ko zamāne meñ tirā naam rahe

aur mujhe Dar hai mohabbat mirī bad-nām na ho

koī din jaatā hai mahfil meñ bikhar jā.egī

apnī hālat pe pareshāñ dil-e-nākām na ho

tū ne kab ishq meñ achchhā burā sochā 'sarvar'

kaise mumkin hai ki terā burā anjām na ho

subh ko chain na ho sham ko aaram na ho

is se behtar hai meri subh na ho sham na ho

mahfil-e-daur-e-ghazal sarf-e-mai-o-jam na ho

zindagi meri bhala kaise bad-anjam na ho

har ghaDi samne hai silsila-e-dar-o-rasan

tujh sa zalim koi ai gardish-e-ayyam na ho

na-muradi ki shikayat zara ye to sochen

na-muradi hi kahin ishq ka inam na ho

mujh ko duniya se hai ummid wafa ki ab tak

koi bhi is tarah sar-gashta-e-auham na ho

shauq hai tujh ko zamane mein tera nam rahe

aur mujhe Dar hai mohabbat meri bad-nam na ho

koi din jata hai mahfil mein bikhar jaegi

apni haalat pe pareshan dil-e-nakaam na ho

tu ne kab ishq mein achchha bura socha 'sarwar'

kaise mumkin hai ki tera bura anjam na ho