sulagti rut thi pa kab tu bhi pas aisa tha

sulagtī rut thī pa kab tū bhī paas aisā thā

ki tere qurb kā manzar bhī pyaas aisā thā

bichhaḌ ke tujh se to ḳhud se bhī sharm aatī hai

tirā vajūd-e-badan par libās aisā thā

ḳhud apne dil kī sadā terī dastakoñ sī lagī

gumāñ meñ thā terā aanā qayās aisā thā

shikast-o-reḳht kī saḳhtī ko kaise jhel gayā

mulā.emat meñ jo paikar kapās aisā thā

jahāñ kahīñ bhī gayā huuñ to ghar ko lauT aayā

udāsiyoñ kā ye māhaul raas aisā thā

fasīl-e-shahr girī aur ġhanīm ke Dar se

koī na chain se soyā hirās aisā thā

paḌheñ to ḳhud ko zamīñ-bos paa.eñ kaj-dastār

mirī kitāb meñ ik iqtibās aisā thā

sulagti rut thi pa kab tu bhi pas aisa tha

ki tere qurb ka manzar bhi pyas aisa tha

bichhaD ke tujh se to KHud se bhi sharm aati hai

tera wajud-e-badan par libas aisa tha

KHud apne dil ki sada teri dastakon si lagi

guman mein tha tera aana qayas aisa tha

shikast-o-reKHt ki saKHti ko kaise jhel gaya

mulaemat mein jo paikar kapas aisa tha

jahan kahin bhi gaya hun to ghar ko lauT aaya

udasiyon ka ye mahaul ras aisa tha

fasil-e-shahr giri aur ghanim ke Dar se

koi na chain se soya hiras aisa tha

paDhen to KHud ko zamin-bos paen kaj-dastar

meri kitab mein ek iqtibas aisa tha