suraj ki kiran ka shoabada hai

sūraj kī kiran kā sho.abada hai

rañg-e-ruḳh-e-zard uḌ gayā hai

naqsh-e-kaf-e-pā ne gul khilā.e

vīrāñ kahāñ ab ye rāsta hai

jaag uTThī haiñ zindagī kī rāheñ

shāyad koī chāñd ko gayā hai

sholoñ se huā thā baaġh ḳhālī

phir sīna-e-gul bhaḌak uThā hai

patte patte kā rañg badlā

badlī badlī huī fazā hai

pahle to na yuuñ kabhī huā thā

tū bhī mujhe dekh kar hañsā hai

begānagī ne ye raaz kholā

tū merā azal se āshnā hai

shabnam sar-e-nok-e-ḳhār yaanī

lab pe mire harf-e-mudda.ā hai

har dard nahīñ davā kā muhtāj

yuuñ bhī to ilāj-e-ġham huā hai

terā hī rahegā bol-bālā

dil merā abas dhaḌak rahā hai

suraj ki kiran ka shoabada hai

rang-e-ruKH-e-zard uD gaya hai

naqsh-e-kaf-e-pa ne gul khilae

viran kahan ab ye rasta hai

jag uTThi hain zindagi ki rahen

shayad koi chand ko gaya hai

sholon se hua tha bagh KHali

phir sina-e-gul bhaDak uTha hai

patte patte ka rang badla

badli badli hui faza hai

pahle to na yun kabhi hua tha

tu bhi mujhe dekh kar hansa hai

beganagi ne ye raaz khola

tu mera azal se aashna hai

shabnam sar-e-nok-e-KHar yani

lab pe mere harf-e-muddaa hai

har dard nahin dawa ka muhtaj

yun bhi to ilaj-e-gham hua hai

tera hi rahega bol-baala

dil mera abas dhaDak raha hai