surat-e-ishq badalta nahin tu bhi main bhi

sūrat-e-ishq badaltā nahīñ tū bhī maiñ bhī

ġham kī hiddat se pighaltā nahīñ tū bhī maiñ bhī

ab zamāne meñ mohabbat hai tamāshe kī tarah

is tamāshe se bahaltā nahīñ tū bhī maiñ bhī

in sulagtī huī sāñsoñ ko nahīñ dekhte log

aur samajhte haiñ ki jaltā nahīñ tū bhī maiñ bhī

apnā nuqsān barābar kā huā āñdhī meñ

ab kisī shāḳh pe phaltā nahīñ tū bhī maiñ bhī

ai samundar tirī phailī huī bāñhoñ kī qasam

apnī maujoñ se nikaltā nahīñ tū bhī maiñ bhī

Dagmagāte haiñ qadam Doltī hai vaqt kī saañs

tār-e-hastī pe sañbhaltā nahīñ tū bhī maiñ bhī

ab vo ġhālib hai na vo ahl-e-karam haiñ 'tauqīr'

'ishq meñ bhes badaltā nahīñ tū bhī maiñ bhī

surat-e-ishq badalta nahin tu bhi main bhi

gham ki hiddat se pighalta nahin tu bhi main bhi

ab zamane mein mohabbat hai tamashe ki tarah

is tamashe se bahalta nahin tu bhi main bhi

in sulagti hui sanson ko nahin dekhte log

aur samajhte hain ki jalta nahin tu bhi main bhi

apna nuqsan barabar ka hua aandhi mein

ab kisi shaKH pe phalta nahin tu bhi main bhi

ai samundar teri phaili hui banhon ki qasam

apni maujon se nikalta nahin tu bhi main bhi

Dagmagate hain qadam Dolti hai waqt ki sans

tar-e-hasti pe sanbhalta nahin tu bhi main bhi

ab wo ghaalib hai na wo ahl-e-karam hain 'tauqir'

'ishq mein bhes badalta nahin tu bhi main bhi