tamir-e-nau qaza-o-qadar ki nazar mein hai

tāmīr-e-nau qazā-o-qadar kī nazar meñ hai

aaj ek zalzala sā har ik bām-o-dar meñ hai

kitne charāġh umiid ke jal jal ke bujh ga.e

kyā jaane kitnī der tulū-e-sahar meñ hai

har ik hai sū-e-manzil-e-jānāñ ravāñ-davāñ

har zarra kā.enāt kā paiham safar meñ hai

gum-karda raah ho ke bhī un se hue na duur

gum-gashtagī bhī hai to usī rahguzar meñ hai

aa.ī kahāñ se dair-o-haram meñ ye raushnī

merī jabīñ kā nuur mire sañg-e-dar meñ hai

guzrī ravish ravish meñ jalātī huī charāġh

shān-e-ḳhirām-e-yār nasīm-e-sahar meñ hai

tum jo nahīñ to ghar meñ vo ab baat hī nahīñ

dīvār-o-dar kī baat to dīvār-o-dar meñ hai

dil bhī dhaḌak rahā hai nigāheñ bhī dar pe haiñ

ik ḳhaas lutf vāda-e-nā-mo'tabar meñ hai

Dar hai kahīñ mujhī ko ye pahle Dubo na de

tūfān-e-iltijā jo mirī chashm-e-tar meñ hai

sāhil tak aa.ī mauj ye kah kar palaT ga.ī

jiine kā lutf zindagī-e-pur-ḳhatar meñ hai

ḳhanjar-ba-kaf hai ye to vo ḳhanjar-dar-āstīñ

itnā sā farq rāhzan o rāhbar meñ hai

aa.ī jigar-figār havādis ke faiz se

shoḳhī jo in dinoñ mire ḳhūn-e-jigar meñ hai

ahl-e-hunar ke dil meñ dhaḌakte haiñ sab ke dil

saare jahāñ kā dard hamāre jigar meñ hai

ifshā-e-rāz-e-dil to baḌā aib hai magar

ho gar adab ke saath to dāḳhil hunar meñ hai

āñkhoñ meñ be-hunar kī khaTaktā hai ban ke aib

ye ik ajiib baat kamāl-e-hunar meñ hai

hotā hai bazm-e-ġhair meñ bhī ab jo zikr-e-ḳhair

koī to baat 'fazlī'-e-āshufta-sar meñ hai

tamir-e-nau qaza-o-qadar ki nazar mein hai

aaj ek zalzala sa har ek baam-o-dar mein hai

kitne charagh umid ke jal jal ke bujh gae

kya jaane kitni der tulu-e-sahar mein hai

har ek hai su-e-manzil-e-jaanan rawan-dawan

har zarra kaenat ka paiham safar mein hai

gum-karda rah ho ke bhi un se hue na dur

gum-gashtagi bhi hai to usi rahguzar mein hai

aai kahan se dair-o-haram mein ye raushni

meri jabin ka nur mere sang-e-dar mein hai

guzri rawish rawish mein jalati hui charagh

shan-e-KHiram-e-yar nasim-e-sahar mein hai

tum jo nahin to ghar mein wo ab baat hi nahin

diwar-o-dar ki baat to diwar-o-dar mein hai

dil bhi dhaDak raha hai nigahen bhi dar pe hain

ek KHas lutf wada-e-na-mo'tabar mein hai

Dar hai kahin mujhi ko ye pahle Dubo na de

tufan-e-iltija jo meri chashm-e-tar mein hai

sahil tak aai mauj ye kah kar palaT gai

jine ka lutf zindagi-e-pur-KHatar mein hai

KHanjar-ba-kaf hai ye to wo KHanjar-dar-astin

itna sa farq rahzan o rahbar mein hai

aai jigar-figar hawadis ke faiz se

shoKHi jo in dinon mere KHun-e-jigar mein hai

ahl-e-hunar ke dil mein dhaDakte hain sab ke dil

sare jahan ka dard hamare jigar mein hai

ifsha-e-raaz-e-dil to baDa aib hai magar

ho gar adab ke sath to daKHil hunar mein hai

aankhon mein be-hunar ki khaTakta hai ban ke aib

ye ek ajib baat kamal-e-hunar mein hai

hota hai bazm-e-ghair mein bhi ab jo zikr-e-KHair

koi to baat 'fazli'-e-ashufta-sar mein hai