tarif us KHuda ki jis ne jahan banaya

tārīf us ḳhudā kī jis ne jahāñ banāyā

kaisī zamīñ banā.ī kyā āsmāñ banāyā

paañv tale bichhāyā kyā ḳhuub farsh-e-ḳhākī

aur sar pe lājvardī ik sā.ibāñ banāyā

miTTī se bel-būTe kyā ḳhushnumā ugaa.e

pahnā ke sabz ḳhil.at un ko javāñ banāyā

ḳhush-rang aur ḳhushbū gul phuul haiñ khilā.e

is ḳhaak ke khañDar ko kyā gulsitāñ banāyā

meve lagā.e kyā kyā ḳhush-zā.eqa rasīle

chakhne se jin ke mujh ko shīrīñ-dahāñ banāyā

sūraj banā ke tū ne raunaq jahāñ ko baḳhshī

rahne ko ye hamāre achchhā makāñ banāyā

pyāsī zamīñ ke muñh meñ meñh kā chuvāyā paanī

aur bādaloñ ko tū ne meñh kā nishāñ banāyā

ye pyārī pyārī chiḌiyāñ phirtī haiñ jo chahaktī

qudrat ne terī un ko tasbīh-ḳhvāñ banāyā

tinke uThā uThā kar lā.īñ kahāñ kahāñ se

kis ḳhūb-sūratī se phir āshiyāñ banāyā

ūñchī uḌeñ havā meñ bachchoñ ko par na bhūleñ

in be-paroñ kā un ko rozī-rasāñ banāyā

kyā duudh dene vaalī gaa.eñ banā.īñ tū ne

chaḌhne ko mere ghoḌā kyā ḳhush-ināñ banāyā

rahmat se terī kyā kyā haiñ nemateñ mayassar

in ne.amatoñ kā mujh ko hai qadr-dāñ banāyā

āb-e-ravāñ ke andar machhlī banā.ī tū ne

machhlī ke tairne ko āb-e-ravāñ banāyā

har chiiz se hai terī kārīgarī Tapaktī

ye kārḳhāna tū ne kab rā.egāñ banāyā

tarif us KHuda ki jis ne jahan banaya

kaisi zamin banai kya aasman banaya

panw tale bichhaya kya KHub farsh-e-KHaki

aur sar pe lajwardi ek saiban banaya

miTTi se bel-buTe kya KHushnuma ugae

pahna ke sabz KHilat un ko jawan banaya

KHush-rang aur KHushbu gul phul hain khilae

is KHak ke khanDar ko kya gulsitan banaya

mewe lagae kya kya KHush-zaeqa rasile

chakhne se jin ke mujh ko shirin-dahan banaya

suraj bana ke tu ne raunaq jahan ko baKHshi

rahne ko ye hamare achchha makan banaya

pyasi zamin ke munh mein meinh ka chuwaya pani

aur baadalon ko tu ne meinh ka nishan banaya

ye pyari pyari chiDiyan phirti hain jo chahakti

qudrat ne teri un ko tasbih-KHwan banaya

tinke uTha uTha kar lain kahan kahan se

kis KHub-surati se phir aashiyan banaya

unchi uDen hawa mein bachchon ko par na bhulen

in be-paron ka un ko rozi-rasan banaya

kya dudh dene wali gaen banain tu ne

chaDhne ko mere ghoDa kya KHush-inan banaya

rahmat se teri kya kya hain nematen mayassar

in neamaton ka mujh ko hai qadr-dan banaya

aab-e-rawan ke andar machhli banai tu ne

machhli ke tairne ko aab-e-rawan banaya

har chiz se hai teri karigari Tapakti

ye karKHana tu ne kab raegan banaya