tamam jism ki parten juda juda karke

tamām jism kī parteñ judā judā karke

jiye chale ga.e qistoñ meñ log mar mar ke

har ek mauj mire paañv chhū ke lauT ga.ī

kahīñ ye ḳhvāb na hoñ niiñd ke samundar ke

mirī kamān meñ haiñ nā-tavāniyāñ merī

ḳhud apnī zaat pe haiñ tiir mere tevar ke

ajab hasīn ḳhayāloñ ko zehn pāltā hai

tarāshtā hai sanam bhī to sañg marmar ke

bhaTak rahī hai kahāñ ruuh sochnā hogā

nikal ga.ī thī kabhī qaid-e-jism se Dar ke

maiñ hādsāt ko har gaam par bulātā huuñ

bahut shikasta haiñ dīvār-o-dar muqaddar ke

'fazā'! zarūr koī taaza gul khilā.egā

qalam ne ḳhuun mirā pī liyā hai jī bhar ke

tamam jism ki parten juda juda karke

jiye chale gae qiston mein log mar mar ke

har ek mauj mere panw chhu ke lauT gai

kahin ye KHwab na hon nind ke samundar ke

meri kaman mein hain na-tawaniyan meri

KHud apni zat pe hain tir mere tewar ke

ajab hasin KHayalon ko zehn palta hai

tarashta hai sanam bhi to sang marmar ke

bhaTak rahi hai kahan ruh sochna hoga

nikal gai thi kabhi qaid-e-jism se Dar ke

main hadsat ko har gam par bulata hun

bahut shikasta hain diwar-o-dar muqaddar ke

'faza'! zarur koi taza gul khilaega

qalam ne KHun mera pi liya hai ji bhar ke