tamam shobade uske kamal uske hain

tamām shobade us ke kamāl us ke haiñ

shikārī aur hai zāhir meñ jaal us ke haiñ

vo ek shaḳhs jo ojhal huā hai āñkhoñ se

har ek chehre pe ab ḳhadd-o-ḳhāl us ke haiñ

basar kiyā hai jise ham ne zindagī kī tarah

matā-e-umr ke sab māh-o-sāl us ke haiñ

vo ḳhush-nasīb hai kitnā ki itne barsoñ se

sitāre burj meñ sab hasb-e-hāl us ke haiñ

ab us se baḌh ke bhalā mo'tabar kaheñ kis ko

zamāna us kā hai māzī-o-hāl us ke haiñ

badaltī rut meñ jise maiñ na bhuul paayā 'hasan'

nishān dil pe mire lā-zavāl us ke haiñ

tamam shobade us ke kamal us ke hain

shikari aur hai zahir mein jal us ke hain

wo ek shaKHs jo ojhal hua hai aankhon se

har ek chehre pe ab KHadd-o-KHal us ke hain

basar kiya hai jise hum ne zindagi ki tarah

mata-e-umr ke sab mah-o-sal us ke hain

wo KHush-nasib hai kitna ki itne barson se

sitare burj mein sab hasb-e-haal us ke hain

ab us se baDh ke bhala mo'tabar kahen kis ko

zamana us ka hai mazi-o-haal us ke hain

badalti rut mein jise main na bhul paya 'hasan'

nishan dil pe mere la-zawal us ke hain