tamanna apni un par aashkara kar raha hun main

tamannā apnī un par āshkārā kar rahā huuñ maiñ

jo pahle kar chukā huuñ ab dobārā kar rahā huuñ maiñ

shikast-e-ārzū arz-e-tamannā shauq-e-lā-hāsil

tirī ḳhātir to ye sab kuchh gavārā kar rahā huuñ maiñ

qafas meñ jī bahalne ke liye vo phuul rakh aa.e

hujūm-e-yās meñ jin par guzārā kar rahā huuñ maiñ

ġharaz us chiiz se mujh ko nahīñ merī na jo hogī

ye baa.is hai ki duniyā se kinārā kar rahā huuñ maiñ

maiñ khul kar kah nahīñ saktā niyāz-e-ishq kī bāteñ

faqat un kī taraf bas ik ishārā kar rahā huuñ maiñ

mire sar par hai baaqī ek saaya mere maazī kā

sambhal kar asr-e-hāzir kā nazārā kar rahā huuñ maiñ

'farīd' ik din sahāre zindagī ke TuuT jā.eñge

sabab ye hai ki ḳhud ko be-sahārā kar rahā huuñ maiñ

tamanna apni un par aashkara kar raha hun main

jo pahle kar chuka hun ab dobara kar raha hun main

shikast-e-arzu arz-e-tamanna shauq-e-la-hasil

teri KHatir to ye sab kuchh gawara kar raha hun main

qafas mein ji bahalne ke liye wo phul rakh aae

hujum-e-yas mein jin par guzara kar raha hun main

gharaz us chiz se mujh ko nahin meri na jo hogi

ye bais hai ki duniya se kinara kar raha hun main

main khul kar kah nahin sakta niyaz-e-ishq ki baaten

faqat un ki taraf bas ek ishaara kar raha hun main

mere sar par hai baqi ek saya mere mazi ka

sambhal kar asr-e-hazir ka nazara kar raha hun main

'farid' ek din sahaare zindagi ke TuT jaenge

sabab ye hai ki KHud ko be-sahaara kar raha hun main