tamiz apne mein ghair mein kya tumhein jo apna na kar sake hum

tamīz apne meñ ġhair meñ kyā tumheñ jo apnā na kar sake ham

har ek mahfil huī gavārā tumhārī mahfil se kyā uThe ham

sahar pashemān-e-ārzū haiñ charāġh-e-shab the so jal bujhe ham

ḳhirāj ashkoñ kā ḳhūn-e-dil se jo ham ko lenā thā le chuke ham

na sham' kāñpī na giit Duube uThe jo ham un kī anjuman se

chalo bas achchhā huā ki aise kahāñ ke mahfil-faroz the ham

na ham siyāhī na ham ujālā charāġh haiñ ashk-e-ārzū ke

ki ham sar-dasht-e-be-karāñ haiñ sulagte rahte haiñ shaam se ham

nazar uThāo to jhuum jaa.eñ nazar jhukāo to Dagmagā.eñ

tumhārī nazroñ se sīkhte haiñ tarīq maut-o-hayāt ke ham

kareñ jo shikva zabāñ kahāñ hai zabāñ meñ tāb-e-fuġhāñ kahāñ hai

kahāñ kā pardes kaisī ġhurbat vatan kī galiyoñ meñ luT ga.e ham

hamārī rūdād muḳhtasar hai vafā kahāñ kī jafā kahāñ kī

ba-rañg-e-gul muskurā diye vo ba-tarz-e-shabnam bikhar ga.e ham

'azīz-qaisī' kahāñ rahe to ki raat us but kī anjuman meñ

hujūm-e-naġhma meñ zikr sun kar kisī divāne kā ro paḌe ham

tamiz apne mein ghair mein kya tumhein jo apna na kar sake hum

har ek mahfil hui gawara tumhaari mahfil se kya uThe hum

sahar pasheman-e-arzu hain charagh-e-shab the so jal bujhe hum

KHiraj ashkon ka KHun-e-dil se jo hum ko lena tha le chuke hum

na sham' kanpi na git Dube uThe jo hum un ki anjuman se

chalo bas achchha hua ki aise kahan ke mahfil-faroz the hum

na hum siyahi na hum ujala charagh hain ashk-e-arzu ke

ki hum sar-dasht-e-be-karan hain sulagte rahte hain sham se hum

nazar uThao to jhum jaen nazar jhukao to Dagmagaen

tumhaari nazron se sikhte hain tariq maut-o-hayat ke hum

karen jo shikwa zaban kahan hai zaban mein tab-e-fughan kahan hai

kahan ka pardes kaisi ghurbat watan ki galiyon mein luT gae hum

hamari rudad muKHtasar hai wafa kahan ki jafa kahan ki

ba-rang-e-gul muskura diye wo ba-tarz-e-shabnam bikhar gae hum

'aziz-qaisi' kahan rahe to ki raat us but ki anjuman mein

hujum-e-naghma mein zikr sun kar kisi diwane ka ro paDe hum