tanz ke tir meri samt chalate kyun ho

tanz ke tiir mirī samt chalāte kyuuñ ho

tum agar dost ho to dil ko dikhāte kyuuñ ho

dekh le ye bhī zamāna ki ho tum kitne amiir

apnī palkoñ ke nagīne ko chhupāte kyuuñ ho

ai mire paañv ke chhālo mire ham-rāh raho

imtihāñ saḳht hai tum chhoḌ ke jaate kyuuñ ho

tishnagī se mirī barsoñ kī shanāsā.ī hai

biich meñ nahr kī dīvār uThāte kyuuñ ho

merī tārīk shaboñ meñ hai ujālā in se

chāñd se zaḳhmoñ pe marham ye lagāte kyuuñ ho

us se jab ahd-e-vafā kar hī liyā hai 'ājiz'

be-vafā kah ke use ashk bahāte kyuuñ ho

tanz ke tir meri samt chalate kyun ho

tum agar dost ho to dil ko dikhate kyun ho

dekh le ye bhi zamana ki ho tum kitne amir

apni palkon ke nagine ko chhupate kyun ho

ai mere panw ke chhaalo mere ham-rah raho

imtihan saKHt hai tum chhoD ke jate kyun ho

tishnagi se meri barson ki shanasai hai

bich mein nahr ki diwar uThate kyun ho

meri tarik shabon mein hai ujala in se

chand se zaKHmon pe marham ye lagate kyun ho

us se jab ahd-e-wafa kar hi liya hai 'ajiz'

be-wafa kah ke use ashk bahate kyun ho