tazin-e-bazm-e-gham ke liye koi shai to ho

taz.īn-e-bazm-e-ġham ke liye koī shai to ho

raushan charāġh-e-dil na sahī jām-e-mai to ho

ham to rahīn-e-rishta-e-be-gāngī rahe

saare jahāñ se terī mulāqāt hai to ho

ġham bhī mujhe qubūl hai lekin ba-qadr-e-shauq

dil kā nasīb dard sahī pai-ba-pai to ho

fariyād ek shor hai āhañg ke baġhair

naala matā-e-dard sahī koī lai to ho

ye kyā ki ahl-e-shauq na apne na aap ke

yā maut yā hayāt koī baat tai to ho

hai duur husn-e-silsila-e-zer-o-bam kī baat

pahle gudāz-e-sīna sazā-vār-e-nai to ho

har-chand do qadam hī sahī manzil-e-murād

ye muḳhtasar sī raah magar 'hosh' tai to ho

tazin-e-bazm-e-gham ke liye koi shai to ho

raushan charagh-e-dil na sahi jam-e-mai to ho

hum to rahin-e-rishta-e-be-gangi rahe

sare jahan se teri mulaqat hai to ho

gham bhi mujhe qubul hai lekin ba-qadr-e-shauq

dil ka nasib dard sahi pai-ba-pai to ho

fariyaad ek shor hai aahang ke baghair

nala mata-e-dard sahi koi lai to ho

ye kya ki ahl-e-shauq na apne na aap ke

ya maut ya hayat koi baat tai to ho

hai dur husn-e-silsila-e-zer-o-bam ki baat

pahle gudaz-e-sina saza-war-e-nai to ho

har-chand do qadam hi sahi manzil-e-murad

ye muKHtasar si rah magar 'hosh' tai to ho