thake huon ko jo manzil kaThin ziyaada hui

thake huoñ ko jo manzil kaThin ziyāda huī

safar kā azm-e-musammam lagan ziyāda huī

udaas peḌoñ ne pattoñ kī bheñT de dī hai

ḳhizāñ meñ raunaq-e-sahn-e-chaman ziyāda huī

zabāñ pe habs kī ḳhvāhish machal machal uThī

havā chalī to gharoñ meñ ghuTan ziyāda huī

safar kā marhala-e-saḳht hī ġhanīmat thā

Thahar ga.e to badan kī thakan ziyāda huī

kabhī to sard lagā dopahar kā sūraj bhī

kabhī badan ke liye ik karan ziyāda huī

urūs-e-zīst pe yuuñ bhī nikhār kyā kam thā

lahū libās kiyā to phaban ziyāda huī

talab ke hoñToñ pe āsūdgī kā lafz kahāñ?

talab vasīla-e-dār-o-rasan ziyāda huī

'nasīm' kis ko thā tahzīb-e-fan kā dhyān yahāñ

hamāre ahd meñ tash.hīr-e-fan ziyāda huī

thake huon ko jo manzil kaThin ziyaada hui

safar ka azm-e-musammam lagan ziyaada hui

udas peDon ne patton ki bhenT de di hai

KHizan mein raunaq-e-sahn-e-chaman ziyaada hui

zaban pe habs ki KHwahish machal machal uThi

hawa chali to gharon mein ghuTan ziyaada hui

safar ka marhala-e-saKHt hi ghanimat tha

Thahar gae to badan ki thakan ziyaada hui

kabhi to sard laga dopahar ka suraj bhi

kabhi badan ke liye ek karan ziyaada hui

urus-e-zist pe yun bhi nikhaar kya kam tha

lahu libas kiya to phaban ziyaada hui

talab ke honTon pe aasudgi ka lafz kahan?

talab wasila-e-dar-o-rasan ziyaada hui

'nasim' kis ko tha tahzib-e-fan ka dhyan yahan

hamare ahd mein tashhir-e-fan ziyaada hui