thi nind meri magar usMein KHwab us ka tha

thī niiñd merī magar us meñ ḳhvāb us kā thā

badan mirā thā badan meñ azaab us kā thā

safīne chand ḳhushī ke zarūr apne the

magar vo sail-e-ġham-e-be-hisāb us kā thā

diye bujhe to havā ko kiyā gayā badnām

qusūr ham ne kiyā ehtisāb us kā thā

ye kis hisāb se kī tū ne raushnī taqsīm

sitāre mujh ko mile māhtāb us kā thā

falak pe kirchiyāñ āñkhoñ meñ motiyā aañsū

jo reza reza huā āftāb us kā thā

mirī zarā sī chamak ko kaḌak ne Tok diyā

savāl tujh se kiyā thā javāb us kā thā

khulī kitāb thī phūloñ-bharī zamīñ merī

kitāb merī thī rañg-e-kitāb us kā thā

thi nind meri magar us mein KHwab us ka tha

badan mera tha badan mein azab us ka tha

safine chand KHushi ke zarur apne the

magar wo sail-e-gham-e-be-hisab us ka tha

diye bujhe to hawa ko kiya gaya badnam

qusur hum ne kiya ehtisab us ka tha

ye kis hisab se ki tu ne raushni taqsim

sitare mujh ko mile mahtab us ka tha

falak pe kirchiyan aankhon mein motiya aansu

jo reza reza hua aaftab us ka tha

meri zara si chamak ko kaDak ne Tok diya

sawal tujh se kiya tha jawab us ka tha

khuli kitab thi phulon-bhari zamin meri

kitab meri thi rang-e-kitab us ka tha