tirgi hi tirgi hai baam-o-dar mein kaun hai

tīrgī hī tīrgī hai bām-o-dar meñ kaun hai

kuchh dikhā.ī de to batlā.eñ nazar meñ kaun hai

kyuuñ jalātā hai mujhe vo ātish-e-ehsās se

maiñ kahāñ huuñ ye mire dīvār-o-dar meñ kaun hai

zaat ke parde se bāhar aa ke bhī tanhā rahūñ

maiñ agar huuñ ajnabī to mere ghar meñ kaun hai

chaak kyuuñ hote haiñ pairāhan guloñ ke kuchh kaho

jhuk ke lahrātā huā shāḳh-e-samar meñ kaun hai

jaise koī pā gayā ho apnī manzil kā surāġh

dhuup meñ baiThā huā rāh-e-safar meñ kaun hai

kāñptā jā dekh kar iz.hār kī tajsīm ko

sochtā jā ārzū-e-shīsha-gar meñ kaun hai

bas zarā biphrī huī maujoñ kī ḳhū maa.il rahī

ahl-e-sāhil jānte to the bhañvar meñ kaun hai

shor kartā phir rahā huuñ ḳhushk pattoñ kī tarah

koī to pūchhe ki shahr-e-be-ḳhabar meñ kaun hai

maiñ to dīvāna huuñ ik sañg-e-malāmat hī sahī

lekin itnā soch lo shīshe ke ghar meñ kaun hai

tirgi hi tirgi hai baam-o-dar mein kaun hai

kuchh dikhai de to batlaen nazar mein kaun hai

kyun jalata hai mujhe wo aatish-e-ehsas se

main kahan hun ye mere diwar-o-dar mein kaun hai

zat ke parde se bahar aa ke bhi tanha rahun

main agar hun ajnabi to mere ghar mein kaun hai

chaak kyun hote hain pairahan gulon ke kuchh kaho

jhuk ke lahraata hua shaKH-e-samar mein kaun hai

jaise koi pa gaya ho apni manzil ka suragh

dhup mein baiTha hua rah-e-safar mein kaun hai

kanpta ja dekh kar izhaar ki tajsim ko

sochta ja aarzu-e-shisha-gar mein kaun hai

bas zara biphri hui maujon ki KHu mail rahi

ahl-e-sahil jaante to the bhanwar mein kaun hai

shor karta phir raha hun KHushk patton ki tarah

koi to puchhe ki shahr-e-be-KHabar mein kaun hai

main to diwana hun ek sang-e-malamat hi sahi

lekin itna soch lo shishe ke ghar mein kaun hai