tere badan se jo chhu kar idhar bhi aata hai

tire badan se jo chhū kar idhar bhī aatā hai

misāl-e-rañg vo jhoñkā nazar bhī aatā hai

tamām shab jahāñ jaltā hai ik udaas diyā

havā kī raah meñ ik aisā ghar bhī aatā hai

vo mujh ko TuuT ke chāhegā chhoḌ jā.egā

mujhe ḳhabar thī use ye hunar bhī aatā hai

ujaaḌ ban meñ utartā hai ek jugnū bhī

havā ke saath koī ham-safar bhī aatā hai

vafā kī kaun sī manzil pe us ne chhoḌā thā

ki vo to yaad hameñ bhuul kar bhī aatā hai

jahāñ lahū ke samundar kī had Thahartī hai

vahīñ jazīra-e-lāl-o-guhar bhī aatā hai

chale jo zikr farishtoñ kī pārsā.ī kā

to zer-e-bahs maqām-e-bashar bhī aatā hai

abhī sināñ ko sambhāle raheñ adū mere

ki un safoñ meñ kahīñ merā sar bhī aatā hai

kabhī kabhī mujhe milne bulandiyoñ se koī

shuā-e-sub.h kī sūrat utar bhī aatā hai

isī liye maiñ kisī shab na so sakā 'mohsin'

vo māhtāb kabhī baam par bhī aatā hai

tere badan se jo chhu kar idhar bhi aata hai

misal-e-rang wo jhonka nazar bhi aata hai

tamam shab jahan jalta hai ek udas diya

hawa ki rah mein ek aisa ghar bhi aata hai

wo mujh ko TuT ke chahega chhoD jaega

mujhe KHabar thi use ye hunar bhi aata hai

ujaD ban mein utarta hai ek jugnu bhi

hawa ke sath koi ham-safar bhi aata hai

wafa ki kaun si manzil pe us ne chhoDa tha

ki wo to yaad hamein bhul kar bhi aata hai

jahan lahu ke samundar ki had Thaharti hai

wahin jazira-e-lal-o-guhar bhi aata hai

chale jo zikr farishton ki parsai ka

to zer-e-bahs maqam-e-bashar bhi aata hai

abhi sinan ko sambhaale rahen adu mere

ki un safon mein kahin mera sar bhi aata hai

kabhi kabhi mujhe milne bulandiyon se koi

shua-e-subh ki surat utar bhi aata hai

isi liye main kisi shab na so saka 'mohsin'

wo mahtab kabhi baam par bhi aata hai