tere KHayal, tere KHwab, tere nam ke sath

tire ḳhayāl, tire ḳhvāb, tere naam ke saath

banī hai ḳhaak mirī kitne ehtimām ke saath

bahut se phuul the aur saare achchhe rangoñ ke

sabā ne bheje the jo kal tire payām ke saath

nazar Thahartī na thī us pe aur ḳhud par bhī

maiñ aa.ine meñ thī kal ek lāla-fām ke saath

tire ḳhayāl se raushan hai sar-zamīn-e-suḳhan

ki jaise zīnat-e-shab ho mah-e-tamām ke saath

phir aa ga.ī hai mire dar pe kyā vahī duniyā?

maiñ kar ke aa.ī thī ruḳhsat jise salām ke saath

sunā hai phuul jhaḌe the jahāñ tire lab se

vahāñ bahār utartī hai roz shaam ke saath

ḳhushī ke vāste kab koī din muqarrar thā

magar ye dil meñ rukī hai tire ḳhirām ke saath

tere KHayal, tere KHwab, tere nam ke sath

bani hai KHak meri kitne ehtimam ke sath

bahut se phul the aur sare achchhe rangon ke

saba ne bheje the jo kal tere payam ke sath

nazar Thaharti na thi us pe aur KHud par bhi

main aaine mein thi kal ek lala-fam ke sath

tere KHayal se raushan hai sar-zamin-e-suKHan

ki jaise zinat-e-shab ho mah-e-tamam ke sath

phir aa gai hai mere dar pe kya wahi duniya?

main kar ke aai thi ruKHsat jise salam ke sath

suna hai phul jhaDe the jahan tere lab se

wahan bahaar utarti hai roz sham ke sath

KHushi ke waste kab koi din muqarrar tha

magar ye dil mein ruki hai tere KHiram ke sath