teri nazar ke ishaaron ko nind aai hai

tirī nazar ke ishāroñ ko niind aa.ī hai

hayāt-baḳhsh sahāroñ ko niind aa.ī hai

tire baġhair tere intizār se thak kar

shab-e-firāq ke māroñ ko niind aa.ī hai

sahar qarīb hai armāñ udaas dil ġham-gīñ

falak pe chāñd sitāroñ ko niind aa.ī hai

tire jamāl se tābīr the jo ulfat meñ

ab un hasīn nazāroñ ko niind aa.ī hai

har ek mauj hai sākit yam-e-mohabbat kī

mire baġhair kināroñ ko niind aa.ī hai

chaman meñ zahmat-e-gulgasht aap farmā.eñ

ye sun rahā huuñ bahāroñ ko niind aa.ī hai

kaho ye sāqi-e-sahbā-navāz se 'qaisar'

phir aaj bāda-gusāroñ ko niind aa.ī hai

teri nazar ke ishaaron ko nind aai hai

hayat-baKHsh sahaaron ko nind aai hai

tere baghair tere intizar se thak kar

shab-e-firaq ke maron ko nind aai hai

sahar qarib hai arman udas dil gham-gin

falak pe chand sitaron ko nind aai hai

tere jamal se tabir the jo ulfat mein

ab un hasin nazaron ko nind aai hai

har ek mauj hai sakit yam-e-mohabbat ki

mere baghair kinaron ko nind aai hai

chaman mein zahmat-e-gulgasht aap farmaen

ye sun raha hun bahaaron ko nind aai hai

kaho ye saqi-e-sahba-nawaz se 'qaisar'

phir aaj baada-gusaron ko nind aai hai