tujhko aawaz se samjhun ki bayan se dekhun

tujh ko āvāz se samjhūñ ki bayāñ se dekhūñ

mo'atabar kyā hai batā tujh ko kahāñ se dekhūñ

āb-dīda huuñ maiñ ḳhud zaḳhm-e-jigar se apne

terī āñkhoñ meñ chhupā dard kahāñ se dekhūñ

is khulī aañkh pe khulte nahīñ asrār tire

tū chhupā hai to tujhe chashm-e-nihāñ se dekhūñ

maiñ ne chāhā thā sanam ban ke tū āñkhoñ meñ rahe

tū ne chāhā maiñ tujhe chashm-e-butāñ se dekhūñ

har taraf tiir baraste haiñ nishāna maiñ huuñ

lauT aatī hai nazar ḳhud pe jahāñ se dekhūñ

is tarah dil meñ utar jā na rahe kuchh baaqī

tū hī tū ho merī nazroñ meñ jahāñ se dekhūñ

tujh ko aawaz se samjhun ki bayan se dekhun

mo'atabar kya hai bata tujh ko kahan se dekhun

aab-dida hun main KHud zaKHm-e-jigar se apne

teri aankhon mein chhupa dard kahan se dekhun

is khuli aankh pe khulte nahin asrar tere

tu chhupa hai to tujhe chashm-e-nihan se dekhun

main ne chaha tha sanam ban ke tu aankhon mein rahe

tu ne chaha main tujhe chashm-e-butan se dekhun

har taraf tir baraste hain nishana main hun

lauT aati hai nazar KHud pe jahan se dekhun

is tarah dil mein utar ja na rahe kuchh baqi

tu hi tu ho meri nazron mein jahan se dekhun