tujhse wabastagi rahegi abhi

tujh se vābastagī rahegī abhī

dil ko ye bekalī rahegī abhī

sar ko dīvār hī nahīñ miltī

so ye dīvāngī rahegī abhī

koī din fursat-e-tamannā hai

koī din sar ḳhushī rahegī abhī

kāsa-e-umr bhar chukā phir bhī

kahīñ koī kamī rahegī abhī

shab vahī hai jamāl-e-ḳhvāb vahī

aañkh apnī lagī rahegī abhī

jis qayāmat kī aamad aamad hai

vo qayāmat Talī rahegī abhī

ham yaqīnan yahāñ nahīñ hoñge

ġhāliban zindagī rahegī abhī

kuchh abhī ranj-e-ārzū hai hameñ

aañkh meñ kuchh namī rahegī abhī

tū abhī mubtalā-e-duniyā nahīñ

tujh meñ ye sādgī rahegī abhī

lā-ta.alluq huuñ us ta.alluq se

aur ye dostī rahegī abhī

jī uchaTtā nahīñ hai lagtā nahīñ

so ye begānagī rahegī abhī

kahīñ koī charāġh jaltā hai

kuchh na kuchh raushnī rahegī abhī

tujh se wabastagi rahegi abhi

dil ko ye bekali rahegi abhi

sar ko diwar hi nahin milti

so ye diwangi rahegi abhi

koi din fursat-e-tamanna hai

koi din sar KHushi rahegi abhi

kasa-e-umr bhar chuka phir bhi

kahin koi kami rahegi abhi

shab wahi hai jamal-e-KHwab wahi

aankh apni lagi rahegi abhi

jis qayamat ki aamad aamad hai

wo qayamat Tali rahegi abhi

hum yaqinan yahan nahin honge

ghaaliban zindagi rahegi abhi

kuchh abhi ranj-e-arzu hai hamein

aankh mein kuchh nami rahegi abhi

tu abhi mubtala-e-duniya nahin

tujh mein ye sadgi rahegi abhi

la-talluq hun us talluq se

aur ye dosti rahegi abhi

ji uchaTta nahin hai lagta nahin

so ye beganagi rahegi abhi

kahin koi charagh jalta hai

kuchh na kuchh raushni rahegi abhi