tum ho mahfil mein to meri chashm-e-tar dekhega kaun

tum ho mahfil meñ to merī chashm-e-tar dekhegā kaun

chāñd ke aage bhalā dāġh-e-jigar dekhegā kaun

yaad ke sūkhe gulāboñ se sajā hai dil kā baaġh

zaḳhm ye guzre dinoñ ke ab magar dekhegā kaun

aap hī kī hai adālat aap hī munsif bhī haiñ

ye to kahiye aap ke aib-o-hunar dekhegā kaun

maiñ hī apnā mohtasib ban jā.ūñ varna dosto

gumrah-e-manzil huuñ yā huuñ raah par dekhegā kaun

bijliyāñ bhar paañv meñ aage zamāne se nikal

ban gayā jo tū ġhubār-e-rah-guzar dekhegā kaun

ek din mazlūm ban jā.eñge zulmoñ kā javāb

apnī barbādī kā mātam umr bhar dekhegā kaun

'manzar' apne ḳhuun se is shāḳh ko sarsabz kar

gar zabāñ miT jā.egī terā hunar dekhegā kaun

tum ho mahfil mein to meri chashm-e-tar dekhega kaun

chand ke aage bhala dagh-e-jigar dekhega kaun

yaad ke sukhe gulabon se saja hai dil ka bagh

zaKHm ye guzre dinon ke ab magar dekhega kaun

aap hi ki hai adalat aap hi munsif bhi hain

ye to kahiye aap ke aib-o-hunar dekhega kaun

main hi apna mohtasib ban jaun warna dosto

gumrah-e-manzil hun ya hun rah par dekhega kaun

bijliyan bhar panw mein aage zamane se nikal

ban gaya jo tu ghubar-e-rah-guzar dekhega kaun

ek din mazlum ban jaenge zulmon ka jawab

apni barbaadi ka matam umr bhar dekhega kaun

'manzar' apne KHun se is shaKH ko sarsabz kar

gar zaban miT jaegi tera hunar dekhega kaun