tum yun hi samajhna ki fana mere liye hai

tum yuuñ hī samajhnā ki fanā mere liye hai

par ġhaib se sāmān-e-baqā mere liye hai

paiġhām milā thā jo husain-ibn-e-alī ko

ḳhush huuñ vahī paiġhām-e-qazā mere liye hai

ye hūr-e-bahishtī kī taraf se hai bulāvā

labbaik ki maqtal kā silā mere liye hai

kyuuñ jaan na duuñ ġham meñ tire jab ki abhī se

mātam ye zamāne meñ bapā mere liye hai

maiñ kho ke tirī raah meñ sab daulat-e-duniyā

samjhā ki kuchh is se bhī sivā mere liye hai

tauhīd to ye hai ki ḳhudā hashr meñ kah de

ye banda do-ālam se ḳhafā mere liye hai

surḳhī meñ nahīñ dast-e-hinā-basta bhī kuchh kam

par shoḳhī-e-ḳhūn-e-shohdā mere liye hai

rāhil huuñ musalmān ba-sad-nāra-e-takbīr

ye qāfila ye bāñg-e-darā mere liye hai

in.aam kā uqbā ke to kyā pūchhnā lekin

duniyā meñ bhī īmāñ kā silā mere liye hai

kyuuñ aise nabī par na fidā huuñ ki jo farmā.e

achchhe to sabhī ke haiñ burā mere liye hai

ai shāfa-e-mahshar jo kare tū na shafā.at

phir kaun vahāñ tere sivā mere liye hai

allāh ke raste hī meñ maut aa.e masīhā

iksīr yahī ek davā mere liye hai

ai chāragaro chāragarī kī nahīñ hājat

ye dard hī dārū-e-shifā mere liye hai

kyā Dar hai jo ho saarī ḳhudā.ī bhī muḳhālif

kaafī hai agar ek ḳhudā mere liye hai

jo sohbat-e-aġhyār meñ is darja ho bebāk

us shoḳh kī sab sharm-o-hayā mere liye hai

hai zulm tirā aam bahut phir bhī sitamgar

maḳhsūs ye andāz-e-jafā mere liye hai

haiñ yuuñ to fidā abr-e-siyah par sabhī mai-kash

par aaj kī ghanghor ghaTā mere liye hai

tum yun hi samajhna ki fana mere liye hai

par ghaib se saman-e-baqa mere liye hai

paigham mila tha jo husain-ibn-e-ali ko

KHush hun wahi paigham-e-qaza mere liye hai

ye hur-e-bahishti ki taraf se hai bulawa

labbaik ki maqtal ka sila mere liye hai

kyun jaan na dun gham mein tere jab ki abhi se

matam ye zamane mein bapa mere liye hai

main kho ke teri rah mein sab daulat-e-duniya

samjha ki kuchh is se bhi siwa mere liye hai

tauhid to ye hai ki KHuda hashr mein kah de

ye banda do-alam se KHafa mere liye hai

surKHi mein nahin dast-e-hina-basta bhi kuchh kam

par shoKHi-e-KHun-e-shohda mere liye hai

rahil hun musalman ba-sad-nara-e-takbir

ye qafila ye bang-e-dara mere liye hai

inam ka uqba ke to kya puchhna lekin

duniya mein bhi iman ka sila mere liye hai

kyun aise nabi par na fida hun ki jo farmae

achchhe to sabhi ke hain bura mere liye hai

ai shafa-e-mahshar jo kare tu na shafaat

phir kaun wahan tere siwa mere liye hai

allah ke raste hi mein maut aae masiha

iksir yahi ek dawa mere liye hai

ai chaaragaro chaaragari ki nahin hajat

ye dard hi daru-e-shifa mere liye hai

kya Dar hai jo ho sari KHudai bhi muKHalif

kafi hai agar ek KHuda mere liye hai

jo sohbat-e-aghyar mein is darja ho bebak

us shoKH ki sab sharm-o-haya mere liye hai

hai zulm tera aam bahut phir bhi sitamgar

maKHsus ye andaz-e-jafa mere liye hai

hain yun to fida abr-e-siyah par sabhi mai-kash

par aaj ki ghanghor ghaTa mere liye hai