tumhaare pas rahen hum to maut bhi kya hai

tumhāre paas raheñ ham to maut bhī kyā hai

magar jo duur kaTe tum se zindagī kyā hai

jab uTh ke chal diye tum tīrgī umaD aa.ī

jo tum na ho to charāġhoñ kī raushnī kyā hai

kuchh aise phuul bhī guzre haiñ merī nazroñ se

jo khil ke bhī na samajh paa.e zindagī kyā hai

bas un kī yaad ke ham paañv chuum lete haiñ

hameñ ḳhabar nahīñ merāj-e-bandagī kyā hai

kabhī jo gosh-bar-āvāz ho ke us ko suno

tumheñ pata bhī chale sāz-e-ḳhāmushī kyā hai

mirī nigāh ne kyā kyā na ḳhvāb dekhe haiñ

tirī nigāh ne ik baat sī kahī kyā hai

hamīñ ne zulmat-e-hastī meñ dil jalā.e haiñ

ye ham samajhte haiñ darmān-e-tīrgī kyā hai

ubhar rahī hai jo rah rah ke dil kī dhaḌkan meñ

vo aarzū hai ki hai us kī bebasī kyā hai

ḳhizāñ-nasīb hoñ nazreñ jo ahl-e-gulshan kī

to phir bahār ke jalvoñ kī tāzgī kyā hai

jahāñ meñ ye kabhī majbūr hai kabhī muḳhtār

hai ek sho.abada 'āzād' aadmī kyā hai

tumhaare pas rahen hum to maut bhi kya hai

magar jo dur kaTe tum se zindagi kya hai

jab uTh ke chal diye tum tirgi umaD aai

jo tum na ho to charaghon ki raushni kya hai

kuchh aise phul bhi guzre hain meri nazron se

jo khil ke bhi na samajh pae zindagi kya hai

bas un ki yaad ke hum panw chum lete hain

hamein KHabar nahin meraj-e-bandagi kya hai

kabhi jo gosh-bar-awaz ho ke us ko suno

tumhein pata bhi chale saz-e-KHamushi kya hai

meri nigah ne kya kya na KHwab dekhe hain

teri nigah ne ek baat si kahi kya hai

hamin ne zulmat-e-hasti mein dil jalae hain

ye hum samajhte hain darman-e-tirgi kya hai

ubhar rahi hai jo rah rah ke dil ki dhaDkan mein

wo aarzu hai ki hai us ki bebasi kya hai

KHizan-nasib hon nazren jo ahl-e-gulshan ki

to phir bahaar ke jalwon ki tazgi kya hai

jahan mein ye kabhi majbur hai kabhi muKHtar

hai ek shoabada 'azad' aadmi kya hai